Тошкентда ЙПХдан қочиб, ўнлаб автомобилларга шикаст етказган ҳайдовчи аёл ҳақида янги маълумотлар

Тошкент шаҳрида ЙПХ ходимидан қочишга уринган ва ўнга яқин автомобиль билан тўқнашиб кетган Gentra автомобилининг ҳайдовчиси ҳақида янги маълумотлар маълум қилинди. Бу ҳақда Тошкент шаҳар ИИББ хабар берди.

Маълум қилинишича, воқеа 19 апрель куни эрталаб соат 07:30 да Чилонзор туманида содир бўлган. Йўл-патруль хизмати инспектори йўл-транспорт ҳодисаси содир этиб, воқеа жойидан яширинишга уринган Gentra автомобилига тўхташ ишорасини берган. Бироқ ҳайдовчи бу талабга бўйсунмай, яна бир нечта автомашинани ҳам урган ҳолда ҳодиса жойидан қочишга ҳаракат қилган.

Ҳуқуқни муҳофаза қилиш органлари томонидан кўрилган чора-тадбирлар натижасида автомобиль тўхтатилган ва уни бошқарган аёл текширилганида, у ҳайдовчилик гувоҳномасига эга эмаслиги ва наркотик модда таъсирида бўлганлиги маълум бўлган. Шунингдек, унинг ва унинг ёнидаги йўловчиларнинг шахсий буюмларидан номаълум моддалар ҳам топилган.

Автомобиль эгаси бўлган шахснинг маълум қилишича, транспорт воситаси унинг отаси номида бўлган. Гумонланувчи аёл машина ҳайдашни сўраганда, у унга рулни беришга рози бўлган.

Ҳозирда ушбу ҳолат бўйича Жиноят кодексининг 277-моддаси (безорилик) 3-қисми “г” банди билан жиноят иши қўзғатилган ва гумон қилинувчилар процессуал тартибда ушланган.

Айни пайтда жабрланган фуқароларга етказилган зарар миқдорини аниқлаш бўйича тегишли экспертизалар тайинланган. Тергов ҳаракатлари давом этмоқда.

Тошкент шаҳар Янгиликлар