Ўзбекистон ҳукумати 37 ёшли Равшан Муҳитдиновни халқаро қидирувга берди. Унинг номи Интерполнинг «қизил билдиришнома»лар рўйхатида расман эълон қилинган.
Маълум қилинишича, у бир нечта жиноий моддалар бўйича айбланмоқда: Жиноят кодексининг 173-моддаси 3-қисми (мулкни қасддан йўқ қилиш ёки зарар етказиш), 242-моддаси 2-қисми (уюшган қуролли гуруҳ тузиш ёки унда иштирок этиш), ҳамда 277-моддаси 3-қисми (безорилик).
Олинган маълумотларга кўра, Муҳитдинов ҳозирда Туркияда яшаб келмоқда ва тадбиркорлик фаолияти билан шуғулланмоқда. Шу билан бирга, у Истанбулда рўйхатдан ўтган “Dünya Engelliler Vakfı” (Бутунжаҳон ногиронлиги бўлган инсонлар фонди) ташкилотида молиявий масалалар бўйича вице-президент сифатида фаолият юритгани айтилмоқда.
«Қизил билдиришнома» халқаро даражада қидирув эълон қилинган шахснинг жойлашувини аниқлаш ва уни қўлга олиш учун асос бўлади. Бундай ҳолатда экстрадиция ёки қонунчиликда кўзда тутилган бошқа ҳуқуқий чоралар қўлланилиши мумкин.
Интерпол ушбу хабарномани аъзо давлатларнинг расмий сўрови асосида эълон қилади ва у суд органлари томонидан чиқарилган ҳибс ордери ёки қарорга таянади.
“Zamin”ни Telegram'да ўқинг!
