Ўзбекистонда никоҳ барқарор, ажримлар нисбати паст сақланмоқда
Ўзбекистонда никоҳ барқарорлиги юқори даражада сақланмоқда, 2025 йилдаги маълумотларга кўра, никоҳ барқарорлиги коэффициенти 175,6 промиллени ташкил этган. Бу ҳар 1000 та никоҳга ўртача 175 та ажрим тўғри келишини англатади, бу эса халқаро миқёсда паст ҳисобланади. Мутахассислар оилавий қадриятлар ва ижтимоий муҳит никоҳни сақлаб қолишда муҳим роль ўйнаётганини таъкидламоқда. Ҳудудлар кесимида Қашқадарё, Хоразм ва Сурхондарё вилоятларида никоҳ барқарорлиги юқори, Тошкент шаҳрида эса ажримлар кўпроқ қайд этилмоқда.
2025 йил якуний кўрсаткичларига кўра, Ўзбекистонда никоҳ барқарорлиги даражаси нисбатан юқори экани яна бир бор тасдиқланди. Расмий таҳлилларга асосан, мамлакатда никоҳ барқарорлиги коэффициенти 175,6 промиллени ташкил этган. Бу эса ҳар 1000 та никоҳга ўртача 175 та ажрим тўғри келишини англатади.
Оила ва гендер илмий-тадқиқот институти мутахассислари томонидан олиб борилган таҳлиллар шуни кўрсатмоқдаки, ушбу кўрсаткич халқаро миқёсда паст ҳисобланади. Яъни, Ўзбекистонда оилавий муносабатлар барқарорлиги кўплаб давлатларга нисбатан яхшироқ сақланиб қолмоқда.
Қиёсий рақамларга назар ташласак, айрим мамлакатларда ажримлар даражаси анча юқори. Масалан, Молдовада бу кўрсаткич 642,7 промилле, Озарбайжонда 431,9, Қозоғистонда 328,2 ва Қирғизистонда 289,6 промиллени ташкил этади. Бу рақамлар фонида Ўзбекистондаги ҳолат анча барқарор экани яққол кўринади.
Мутахассислар фикрича, бундай натижалар жамиятда оилавий қадриятлар мустаҳкам экани, анъаналар ва ижтимоий муҳит никоҳни сақлаб қолишда муҳим ўрин тутаётганини англатади.
Ҳудудлар кесимида қаралганда ҳам қизиқ манзара кузатилади. Қашқадарё, Хоразм ва Сурхондарё вилоятларида никоҳ барқарорлиги юқори даражада сақланаётган бўлса, Тошкент шаҳри, Сирдарё ва Тошкент вилоятида ажримлар нисбатан кўпроқ қайд этилмоқда.
Қисқача айтганда, статистика қуруқ рақам эмас — бу жамият кайфияти. Ва ҳозирча сигнал позитив: оила институти ҳали ҳам “стабил режим”да ишлаяпти.
Изоҳлар 0
…