Президент Ш.Мирзиёев АҚШдаги ватандошлар билан учрашувда нималарни гапирди? (видео)

Ўзбекистон Республикаси Президенти Шавкат Мирзиёев 20 сентябрь куни Нью-Йоркда Америка Қўшма Штатларида истиқомат қилаётган бир гуруҳ ватандошлар билан учрашгани ҳақида хабар берган эдик, деб ёзади Кун нашри.

Ватандошларимиз орасида олимлар, ишбилармонлар, халқаро ва жамоат ташкилотлари вакиллари, талабалар бор эди.

«Ватандан йироқда, мусофирчиликда ўз ўрнини топиш ва ҳақли эътироф қозониш нақадар машаққатли эканини барчамиз яхши англаймиз. Бундай катта ютуқларга эришиш ҳар кимга ҳам насиб этавермайди. Бугун сизлар билан очиқ мулоқот қилиб, сизлар билан яқиндан танишиш, мамлакатимиз олдида турган катта-катта вазифаларни амалга ошириш борасидаги фикр ва мулоҳазаларингиз, таклифларингиз билан ўртоқлашиш ғоят муҳим, деб ҳисоблайман», — деди Президент ватандошлар билан учрашувда.

Шавкат Мирзиёев уларга мурожаат қилар экан, Ўзбекистонда амалга оширилаётган кенг кўламли ислоҳотларга дахлдор бўлиш, замонавий билим ва тажрибаларини мамлакат ривожига йўналтиришга даъват этди.

«Мамлакатимиз тараққиётига ҳисса қўшиш истагида бўлган барча чет элдаги юртдошларимизни Ўзбекистонга таклиф этаман, — деди давлат раҳбари. — Мен уларни қўллаб-қувватлашга ва ҳар томонлама рағбатлантиришга тайёрман.

Барчангизнинг мамлакатимизни ривожлантиришга сидқидилдан ҳисса қўшишга тайёр эканингизни кўриб, чин дилдан мамнун бўлиб турибман. Ҳаммамиз жонажон Ватанимиз равнақи йўлида бир ёқадан бош чиқариб бирлашсак, олдимизга қўйган ҳар қандай юксак маррага албатта етишимизга ишонаман».

Президентнинг Нью-Йорк шаҳрида ўзбекистонлик ватандошлар билан учрашувда сўзлаган мурожаатини қуйидаги ҳаволадан томоша қилишингиз мумкин:
[media=https://youtu.be/SdFCcpDHXU4] “Замин” янгиликларини “Facebook”да кузатиб боринг