Олотда 5 йилдан буён ичкуёв бўлиб яшаган эркак қайнотасининг уйида осилган ҳолда топилган (видео)

Бухоро вилояти Олот туманида беш йилдан буён ичкуёв бўлиб яшаган 32 ёшли Нарзулла Умаров жорий йилнинг 24 июнь куни вафот этган. Эркак қайнотасининг уйида осилган ҳолда топилган. Унинг танасида бешафқатларча етказилган тан жароҳатлари ва куйиш излари мавжуд бўлган. Бу ҳақда «Мy5» телеканалининг «Марказий студия» ахборот дастурида намойиш этилган лавҳада маълум қилинган.

Марҳумнинг кичик акаси айтишича, Нарзулла воқеа юз берган куни соат 15:30 да катта акасига телефон қилиб, «2 дақиқадан кейин бу ердан менинг ўлигимни олиб кетасизлар«, деб айтган.

Нарзулланинг катта акаси маълум қилишича, улар укасининг қайнотасиникига бориб, уни молхонада осилган ҳолда топган. Аканинг сўзларига кўра, осилган укасининг оёғи тагида ҳеч нарса бўлмаган. «Ўзини осадиган одам оёқ тагига бирор нарса қўйиб осади», — дейди марҳумнинг акаси.

Умаровлар оиласининг маълум қилишича, улар экспертиза хулосасидан норози. Катта аканинг айтишича, терговчи Акмал Омонов уларга экспертиза хулосасини бермаган ва унинг укаси ўзини-ўзи ўлдирганини айтган. Куйиш эса қуёш уриши натижасида юзага келганини маълум қилган.

Аканинг маълум қилишича, одам офтобдан бу даражада куймайди. «1 соат 45 дақиқада бу даражада куйса, бу қандай одам бўлади?», — дейди марҳумнинг акаси.
Марҳумнинг акалари айтишича, маҳалладан ва ички ишлар идораларидан ҳеч ким бу ҳолат билан қизиқиб, оилага мурожаат қилмаган. «Замин» янгиликларини «Вконтакти»да кузатиб боринг