«Тилла топиб олдим, кимники?»

Бир биродарим қуйидаги эълонни тарқатиб беришимни илтимос қилди.
“Бу йигирма йиллар олдинги гап. Аниқроғи, 23-26 йиллар бурун бўлган.

Бир куни бомдод вақтидан кейин маҳаллалар орасидаги кўчада кетаётиб, ғалати нарсага кўзим тушди. Энгашиб олишга эриниб бир тепдим. Сал нарига бориб тушди, аммо энди ялтираб кетди. Олиб, у ёқ-бу ёғини айлантириб кўрдим. Ғаройиб нарса экан. Олдин ҳеч кўрмаганман. Ёшлигимиздаги каби атрофимга аланглаб, кимники, кимники, деб уч марта сўрадим.
Ёз пайти бўлгани учун қуёш чиққан бўлса-да, ҳали эрта эди, кўчада ҳеч ким кўринмасди. Топилдиқни чўнтакка солдим. Кейин ишга борганимда ўрис кампирга кўрсатдим. "Ух вы, – деди момой. – Бу эски замоннинг тиллоси-ку!" Топиб олдим, десам, ишонмади. "Сенда яна бўлса керак бунақа тиллолардан, лекин билдирмайсан-а", деди.

Ўша пайтлар жуда қашшоқ эдим. Бир сўм пулга муҳтож эдим. Нафақат ўзимнинг оилам, балки касалманд ота-онамга ҳам ёрдам беришим керак эди. Хуллас, шунақа сабаблар ёки баҳоналар билан тиллони пул қилиб ишлатиб юбордим. Салкам беш (5) грамм чиққан.

Энди у тилло йўқ. Кимларнинг қўлига ўтиб кетди, билмайман. Аммо, ҳеч бўлмаса, унинг қийматини эгасига қайтармоқчиман. Эгасини рози қилмоқчиман. Ҳақ қиёматга қолмасин. Тиллонинг эгасини топишга ёрдам беринглар, илтимос...”

Дўстингиз мана шу илтимосини сизларга етказишимни илтимос қилди. Мен ҳам сизлардан илтимос қиламан, ушбу хабар иложи борича кўпроқ тарқатилса, улашилса, етказилса. Зора, сизлар сабабли Яратган Эгам дўстингизга бўйнидаги омонатни эгасига қайтаришни муяссар айласа.

Тилло топилган жой: Зангиота туман марказидаги (халқ тилида: райцентр) ора кўчалардан бирида.
Топилган вақти: тахминан 1993-96 йиллар ораси.
Тиллонинг оғирлиги: салкам 5 гр.

Энди қанақа тилло экани айтилса ва топилмага сифатлари тўғри келса, шу одамга ўша тиллонинг бугунги қиймати антиквар – ноёблиги ҳисобга олинган ҳолда қайтарилади.
Мурожаат учун рақам: + 99890 938 9559.
“Замин” янгиликларини “Facebook”да кузатиб боринг