Коронавирус: касалликнинг ҳомиладор аёлларга таъсири қандай?

Спирт танага кирган вирусларни йўқ қила олмайди, ишлатилган ниқобларни қайта ишлатиб бўлмайди.

Танага спирт ёки хлор пуркаш коронавирусни йўқ қила оладими?
Йўқ, танага спирт ёки хлорни пуркамаслик керак. Улар танага кирган вирусларни йўқ қила олмайди. Аксинча, улардан фойдаланиш кийим, кўз ва оғиз учун зарарли бўлиши мумкин. Спирт ва хлордан фойдаланиш тавсия этилган ўринларда қўлланилса, спирт юзаларни дезинфекциялаш учун фойдали бўлади;

Коронавирус узоқ масофаларга ҳаво орқали тарқалиши мумкинми?
Йўқ, коронавирус узоқ масофаларга ҳаво орқали тарқалмайди. Бу вирус асосан йўталган ёки аксирган пайтда касал одамнинг оғзидан ёки бурнидан сачраган томчилар орқали юқади. Бу томчилар оғир бўлгани учун ҳаво орқали узоқ масофаларга етиб бориши мумкин эмас. Лекин ўша йўтал ёки акса уришдан сачраган томчилар теккан сиртга ёки нарсага тегиб, кейин қўлини кўзга, оғизга ёки бурунга теккизган одамга ҳам юқиши мумкин. Шунинг учун қўлларни спиртли воситаларда тез-тез тозалаш ёки уларни совун билан ювиб туриш керак.

Ишлатилган ниқобларни қайта ишлатиш мумкинми? Ниқобларни қўлни дезинфекциялаш воситаси билан дезинфекция қилиш мумкинми?
Йўқ, ишлатилган ниқобларни қайта ишлатиш ёки ишлатилгандан кейин дезинфекциялаш мумкин эмас. Нафас йўли юқумли касаллигига чалинган, жумладан, коронавирус юқтириб олган киши билан мулоқотда бўлсангиз, ниқобнинг ташқи тарафига инфекция тушган бўлади. Шунинг учун ниқобнинг ўша ташқи тарафига қўл теккизмай туриб, ундан халос бўлиш керак. Ниқобни ечгандан кейин қўлларни спирт билан ишқалаш ёки совунлаб ювиш шарт.

Ҳомиладор аёллар коронавирус инфекциясига кўпроқ мойил бўладими ёки инфекция асоратлари уларга кўпроқ таъсир қиладими?

Ҳомиладор аёлларнинг коронавирусга чалиниш эҳтимоли кўпроқ экани ёки инфекция асоратларига кўпроқ мойил экани ҳақида аниқ тасдиқланган илмий-тадқиқотлар хулосаси йўқ. Лекин умуман олганда, ҳомиладор аёлларда иммунитет бироз пасайиши ёки бошқа физиологик ўзгаришлар кузатилади, натижада улар нафас йўллари инфекциясига нисбатан кўпроқ заифлашиб қолиши мумкин. Шунинг учун гигиена қоидаларига амал қилган ҳолда бу вируснинг уларга юқишидан эҳтиёт бўлиш керак: қўлларни доим ювиб юриш, касалланганлардан четланиш керак.

Бу маълумотлар махсус ишга туширилган “Koronavirusinfo” каналида тақдим этилган. «Замин»ни Telegram’да ўқинг!