17:37 / 15.01.2022

Умра зиёрати қачондан бошланиши ва унинг нархлари ҳақида маълумот берилди

Ўзбекистон мусулмонлари идораси раиси, муфтий Нуриддин домла ҳазратлари Саудия Арабистонидаги «Абу Сарҳад» ҳамкор ширкати билан Умра – 2022 мавсумини амалга ошириш бўйича шартнома тузгани ҳақида хабар берилганди.

Мусулмонлар идорасининг маълум қилишича, шундан сўнг ҳудудларда пандемиядан олдин навбатда турган фуқаролар рўйхатларини шакллантириш, авиақатнов жадвалларини ишлаб чиқиш, қўшимча тўловларни амалга ошириш ва зиёратчиларни тиббий кўрикдан ўтказиш ишлари бошлаб юборилган.

Ўзбекистон мусулмонлари идораси умра зиёрати бўйича бир қатор саволларга жавоб берди.

Умра сафари қачондан бошланади?
— Аллоҳ насиб этса, 2022 йил 22 январь куни биринчи рейсни Саудия Арабистонига учиришга тайёргарлик кўрилмоқда. Шундан сўнг 25, 28 январь кунлари ҳам навбатдаги рейслар амалга оширилади. Келгусида муборак сафарга рейслар сезиларли даражада ошириб борилади, иншааллоҳ.

Бошланаётган умра сафарига қачон рўйхатга ёзилган фуқаролар жўнатилади?
— Жорий умра мавсумида биринчи навбатда пандемиядан олдин, яъни 2020 йил февраль ойи охирига қадар умра зиёрати учун тўловларни амалга ошириб, сафарга бора олмаган фуқаролар юборилади.

Умра тўлови қанча этиб белгиланди?
Қайд этганимиздек, пандемиядан олдин, яъни 2020 йил февраль ойига қадар умра зиёрати учун охирги белгиланган тўловларни амалга оширганлар қўшимча равишда 4 770 000 сўм маблағ тўлайди. Ушбу қўшимча тўловни белгилашда, меҳмонхоналарда зиёратчиларнинг хоналарга, автобусларда ўриндиқларга жойлаштиришда оралиқ масофа ҳисобига 50 фоизгача қисқартирилиш, озиқ-овқат маҳсулотларини қадоқланган ҳолда тарқатиш, ўрнатилган бошқа карантин тартиб-қоидаларни таъминлаш, 15 фоиз Саудия ҚҚС солиғи каби сарф-харажатлар ҳам ҳисобга олинган. Шунингдек, Макка ва Мадина шаҳарларида энг замонавий меҳмонхоналар зиёратчиларимизга хизмат қилади.

Мазкур тўловларни амалга оширишда зиёратчиларга қулайлик яратиш мақсадида, «Aloqabank» АТнинг барча филиалларида ҳар куни, ҳатто шанба ва якшанба кунлари ҳам қабул қилинади.

Маълумот учун, 2020 йил бошида Умра зиёрати учун тўлов миқдори 13 млн сўм атрофида белгиланган эди. Ўзбекистон мусулмонлар идорасининг бугунги ахборотида энди навбатга ёзилаётганлар учун тўлов миқдорига аниқлик киритилмаган. Пандемиядан олдин тўлов қилганлар 4,8 млн сўмга яқин қўшимча тўлов қилаётганидан келиб чиқилса, янги нарх 17,8 млн сўм атрофида этиб белгиланганини тахмин қилиш мумкин.

Зиёратчилар учун қайси вакцина билан эмланиш талаб этилади?
— Умра сафарига борувчи фуқаро COVID-19’га қарши Астра-Зенеcа, Moderna, Pfizer ёки Жонсон & Жонсон вакциналари билан тўлиқ эмланиб, сертификатга эга бўлиши лозим. Талаб қилинган вакциналарни эмас, балки «Спутник V» ва Ўзбекистон-Хитой каби вакциналар билан тўлиқ эмланган фуқаролар юқорида саналган вакциналаридан бири билан 1 марта эмланиши кифоя қилади.

Саудия Арабистонида умра амалини адо этиш қилиш учун дастур орқали навбатга туриш тартиби қандай?
– Ҳар бир зиёратчида смартфон (Samsung, iPhone ёки бошқа турдаги сенсор) телефони бўлиши талаб этилади. Android телефон учун PlayМаркет ва IOS мобил қурилма учун «АппСторе»дан «توكلنا» («Tawakkalna») ва «اعتمرنا» – («Eatmarna») электрон дастурлари юклатилган бўлиши лозим. Мазкур дастурлар телефонда «геолокация» ва «интернет» ёқилгандагина ишлайди. Бу дастурлар зиёратчи Саудия Арабистони давлат чегарасидан ўтиб, Мадина шаҳрида тегишли маълумотлар билан тўлдирилгандан кейингина ишга тушади.

Зиёратчи Саудияга етиб бориши билан Саудия мобил алоқа оператори сим картасини харид қилади ва интернет тўпламини ишга туширади. Сим картани аэропортда ёки Мадина шаҳридаги меҳмонхонада харид қилиш мумкин бўлади.

«Умра қилиш мобил дастури» зиёратчига 1 мартагина умра амалини бажаришга ва фақат 5 маҳал намозга чиқишига рухсат бериши мумкин. Қайта умра қилиш учун «Tawakkalna» ва «Eatmarna» орқали сўровнома берилади. Тизим рухсат берган муддатда «Оиша она» – Танъийм масжидидан эҳромга кириб кейин яна умра амалини адо этиши мумкин.

Саудия Арабистонида қандай карантин талаблари ўрнатилган?
– Саудия Арабистони ҳудудига умра зиёрати учун кираётган хорижлик фуқаро талаб этилган вакциналар билан эмланган бўлиб, бу тўғридаги сертификатга ва 48 соатлик ПСР тестига эга бўлиши, зиёратчи ўзи билан 30 та тиббий ниқоб олиши (ҳар 4 соатда алмаштириш учун) ва Саудия Арабистонида доимий тиббий ниқобда юриши ва оралиқ масофага риоя қилиниши белгиланган. Таъкидлаш керакки, тиббий ниқоб тақмаганлик учун 300 АҚШ доллари миқдорида жарима белгилаган. Зиёратчилар умра сафари якунида она-Ватанга қайтишдан аввал ўз ҳисобларидан Макка шаҳридаги меҳмонхонада ПСР тест топширишлари керак бўлади.

Умра сафари учун янги навбатлар қаерда ёзилади?
— 18 ёшдан катта бўлган Ўзбекистон фуқароси умра сафарига бориш учун ўзи рўйхатда турган маҳалла фуқаролар йиғинига шахсини тасдиқловчи ҳужжат билан чиқиб, умра сафари учун очилган махсус дафтарга рўйхатга ёзилади ва шу ҳақдаги маълумотномани олади. Ушбу дафтар бўйича навбати келган фуқарони МФЙ туман-шаҳарга тавсия беради. Сўнг ҳудуддаги поликлиникада тиббий кўрикдан ўтади. Натижалар яхши чиқса, умра учун белгиланган тўлов суммасини тўлайди. Шунингдек, хорижга чиқиш паспорти, тиббий кўрикдан ўтгани, вакцина олгани тўғрисидаги маълумот ва сертификат ва тўлов қоғозининг нусхасини тақдим қилади.