Sony Pictures’нинг "Kimetsu no Yaiba Infinity Castle" фильми Шимолий Америкада йирик муваффақият қозонди. Картина фақат очилиш ҳафтасидаёқ АҚШ ва Канадада 70 миллион доллар даромад топиб, 1999 йилдаги "Pokemon: The First Movie — Mewtwo Strikes Back" ўрнатган 31 миллион долларлик рекордни ортда қолдирди.
Box Office Pro бу фильмдан 60–75 миллион доллар атрофида сотув кутаётганини айтганди, натижа эса кутилганидан юқори бўлди.
“Demon Slayer” машҳур япон комиксига асосланган бўлиб, 220 миллиондан ортиқ нусхада сотилган. Унинг асосида сериаллар, ўйинлар ва бошқа фильмлар ҳам яратилган. Янгиси эса Crunchyroll орқали тарқатилган трилогиянинг биринчи қисми бўлиб, жаҳон бўйлаб 280 миллион долларга яқин тушум қайд этди.
Мутахассислар фикрича, “Demon Slayer” аниме дунёсида сифат ва оммабопликнинг янги босқичини очди. Шу билан бирга, Sony компанияси бу йўналишда ўз кучини Netflix учун ишланган "KPop Demon Hunters”, фильмида ҳам намоён қилганди.
Аниме жанрининг оммалашиши Sony’нинг умумий бизнесига катта таъсир кўрсатиб, унинг ўйин, мусиқа, кино ва телевидение соҳаларидаги улушини сезиларли оширмоқда.
«Замин»ни Telegram’да ўқинг!
