Италиялик 41 ёшли модель Бианка Балти яқинда Substack орқали ўзининг таъсирли ҳаётий ҳикоясини баҳам кўрди. Унинг сўзларига кўра, 2024 йил октябрь ойида тухумдон саратонига қарши даволанишни бошлаган ва шу даврда Victoria’s Secret кўргазмасига қатнашиш учун компанияга мурожаат қилган.
Балти ҳикоясига кўра, у 6 октябрда компанияга хат йўллаб, 15 октябр куни бўлиб ўтадиган машҳур шоуда иштирок этиш учун рухсат сўраган.
«Қаердан куч олганимни билмайман, аммо мен бу ишни қилдим. Ҳаётда афсусланишга арзийдиган ягона нарса — қўлдан кетказилган имкониятлардир. Шу сабаб ўзимга: “Нимани йўқотяпман?” деб савол бердим ва қарор қилдим. LinkedIn орқали компания ходимларининг электрон почталарини излаб топдим ва хатимни ҳаммасига юбордим», — деб ёзади модель.
Балти сўзларини шундай давом эттирди:
«Мен энг ёш ёки энг келишган аёл эмасман. Аммо мен кучлиман, жасурман ва ҳаётга тўламан. Менинг чандиқларим — фахрим, қайта ўсган сочларим — ғалабам. Агар мен бу подиумга чиқсам, бу фақат шахсий ғалабам эмас, балки миллионлаб аёлларга йўлланган хабар бўлади: “Ҳаёт синовларга қарамай давом этади. Сен ҳали ҳам гўзалсан, сен тўлиқсан. Сени ҳеч ким тўхтата олмайди.”»
Компания ҳали бу мурожаатга расмий изоҳ бермаган бўлса-да, ижтимоий тармоқларда Бианканинг жасорати ва самимий сўзлари катта қўллаб-қувватлашга сазовор бўлди.
