Голливуднинг машҳур актрисаси ва режиссёри Анжелина Жоли Украинага инсонпарварлик ташрифи билан етиб келди. Бу ҳақда мамлакат оммавий ахборот воситалари маълум қилди.
Маълумотларга кўра, у Херсон шаҳридаги тиббиёт муассасаларига бориб, у ердаги шифокорлар ва беморлар билан суҳбатлашган. Жолининг ташрифи UNICEF ташкилотининг “эзгу ният элчиси” сифатида амалга оширилаётган миссия доирасида бўлиб ўтган.
Манбаларнинг таъкидлашича, актриса Херсонга бориш йўлида Николаев вилоятидаги ҳарбий чақирув бўлимига ҳам кириб ўтган. Бунинг сабаби — унинг украиналик қўриқчиси вақтинчалик ушлаб турилгани билан боғлиқ бўлган.
Жоли Украинага биринчи марта келаётгани йўқ. У 2022 йил апрел ойида ҳам Лвов шаҳрида бўлиб, у ерда урушдан жабр кўрган болалар билан учрашган ва қочқинлар марказига ташриф буюрганди.
Актрисанинг Херсонга сафари уруш таъсирида қолган ҳудудларда аҳолига моддий ва маънавий ёрдам кўрсатиш, жаҳон жамоатчилигининг эътиборини Украинадаги инсонпарварлик инқирозига қаратиш мақсадида ташкил этилган.
Кузатувчиларнинг фикрича, Жоли бу сафар орқали нафақат тиббиёт соҳаси ходимларига маънавий рағбат берди, балки Украина аҳолисига дунё ҳамжиҳатлигини яна бир бор намоён этди.
“Zamin”ни Telegram'да ўқинг!
