Telegram асосчиси Павел Дуров ўзининг соғлом турмуш тарзига оид қарашлари билан яна бир бор жамоатчилик диққат марказига тушди. У айтган оддий, аммо жуда қатъий одатлар соғлиқни узоқ йиллар давомида барқарор сақлашга ёрдам бериши таъкидланди. Ижтимоий тармоқда берилган “Нега баъзи одамлар деярли хасталикка чалинмайди?” деган саволга Дуров қисқа, лекин жуда аниқ жавоб қайтарган.
Унинг таърифлашича, кучли иммунитет ва барқарор соғлиқнинг асоси бир мунча омилларга бориб тақалади: кунига камида 8 соатлик пухта уйқу, табиий ва пок маҳсулотлардан иборат овқатланиш, мунтазам жисмоний ҳаракат, руҳий барқарорликни сақлаш, алкоголь ва тамакидан тўлиқ воз кечиш, шунингдек, зарурат бўлмаса дориларни қабул қилмаслик.
Маълумотларга кўра, Дуров бу қоидаларга 20 йилдан бери узлуксиз амал қилиб келади. У алкоголь, сигарета, шунингдек кофеинли ичимликларни умуман истеъмол қилмайди. Унинг куни одатда муздек ванна билан бошланади — душдаги сув ҳарорати деярли нол даражага яқин бўлади. Бундан ташқари, у ҳар куни камида бир соат жисмоний машқ бажаради ва қаттиқ уйқу режимига амал қилади. Шу тарздаги интизом натижасида Дуров 41 ёшида ҳам ёш кўринишини сақлаб қолган ва унинг айтишича, охирги марта 15 йил аввал шамоллаган.
Дуровнинг ушбу фикрлари ижтимоий тармоқларда катта муҳокамага сабаб бўлди. Кўплаб фойдаланувчилар унинг маслаҳатларидан руҳланиб, ўзининг зарарли одатларини тарк этишга бел боғлаганини ёзмоқда. Бошқалар эса қўшимча қилиб, бундай тартибни амалга ошириш учун фақат кучли ирода эмас, “миллиард доллар ва БААда яшаш визаси ҳам ортиқча бўлмайди”, деган ҳазиломуз фикрлар ҳам билдирилган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
