Ҳиндистондаги Adani Group конгломератига асос солган ва уни бошқараётган Гаутам Адани Reliance Industries раҳбари Мукеш Амбанини ортда қолдириб, Осиёнинг энг бой инсони мақомини яна қўлга киритди. Бу ҳақда бугун, 17 апрель куни янгиланган “Bloomberg Billionaires Index” рейтинги маълумотларида қайд этилди.
Аданининг умумий бойлиги 92,6 миллиард долларга етгани унга жаҳон рейтингида 19-поғонани, минтақада эса биринчи ўринни эгаллаш имконини берди. Амбанининг сармояси эса 90,8 миллиард долларга баҳоланиб, у глобал рўйхатда 20-ўринда қайд этилган.
Бу муваффақиятнинг асосий сабаби сифатида Adani Group акциялари қийматининг ошгани кўрсатилмоқда. Йил бошидан буён компаниянинг энергетика, аэропортлар ва порт логистикаси соҳаларида фаолият юритувчи тузилмалари акциялари қимматлашгани натижасида Аданининг бойлиги 8,1 миллиард долларга кўпайган. Шу билан бирга, шу давр мобайнида Амбанининг капитали 16,9 миллиард долларга камайгани кузатилган. Осиёнинг энг бой учлиги эса ByteDance асосчиси Чжан Имин (68,7 миллиард доллар) билан якунланмоқда.
Жаҳон миқёсида эса катта фарқ билан Tesla ва SpaceX компаниялари бош директори Илон Маск етакчиликни сақлаб турибди — унинг бойлиги 656 миллиард долларга баҳоланган. Иккинчи поғонани Google асосчиларидан бири Ларри Пейж (286 миллиард доллар), учинчи ўринни эса Amazon асосчиси Жефф Безос (269 миллиард доллар) эгаллаб турибди. Дунёнинг энг бой инсонлари орасида энг катта йўқотиш эса LVMH раҳбари Бернар Арнода қайд этилган — унинг бойлиги 44 миллиард долларга қисқарган.
“Zamin”ни Telegram'да ўқинг!
