Кулгуга нима етсин

Дам олишдан кейин кўзи қизариб ишга келган ходимдан бошлиқ сўради:

— Нега кўзларингиз қизарган? Уйқуга тўймадингизми?

— Йўқ! Ишхонани соғиниб, йиғладим!..
***
Бир киши ҳамкасбига шикоят қиляпти:

— Эрталаб ухлагинг келади, кундузи овқат егинг, кечқурун дам олгинг. Ишлашга вақт йўқ!
***
— Зебохон, менга исмингиз жудаям ёқади!

— Раҳмат. Уни туғилган кунимга совға қилишган.
***
Дунёдаги энг омадсиз балиқчи чувалчангининг 14 ёшини нишонлади.
***
Э, худойим, мени катта маош билан жазола! “Шунча пулни нимага сарфлайман энди”, деб бир қийналай!
***
Эрта тонгда турибоқ, кўзгуга қарадим. Ўзимни танимадим… Демак, энди бой бўлар эканман.
***
Онасиникига кетиб қолган хотин эрига қўнғироқ қилди:

— Кетганимга олти ҳафта бўлди. Наҳотки, қўнғироқ қилиб айтадиган бирорта сўзингиз ҳам бўлмаса-я?!

— Бор!

— Айтинг!

— Раҳмат!
***
Аслини олганда ишга боришим кераклигини тўғри қабул қиламан. Аммо у ерда ўтириб, уйга қайтиш вақтини нақ 8 соат кутиш азоб!
***
— Дадажон, ойим сиз уйда пайпоқда шиппаксиз юришингизни тайинладилар, — деди бола отасига.

— Нимага? — сўради ота.

— Нимагалигини дадангга айтма, дегандилар. Бу иккаламизнинг кичкинагина сиримиз бўлиб қоларкан.

— Айтақол, илтимос, она қизим?

— Майли, фақат ойим билмасин. Кеча шу уйдаги гиламнинг устида игна йўқотиб қўйган эканлар, шуни ўзингиз топиб беришингизни хоҳлаяптилар…
***
— Менга ойижоним, ҳар битта олган “беш” баҳоим учун биттадан ширин кулча олиб берадилар, — мақтанди бир қиз дўконда.

— Ҳа, кўринишингдан аълочи қизга ўхшаб турибсан!
***
— Дадаси, ростини айтинг, менга гилам олиб берасизми, йўқми?

— Ҳозирча, супургида учиб тур!
***
Яқинда “Нимани мақтасанг, ўшасиз қоласан”, деган бир ажойиб гапни эшитиб қолдим. Шундай экан азизларим, яхшилаб эшитиб олинглар… Мен 2та кредитим ва ортиқча вазним билан мақтаняпман!
***
Хотинга маошнинг ҳаммасини бериш қийин эмас. Уни маошнинг ҳаммаси шу эканлигига ишонтириш қийин.
***
— Ўртоқ ҳайдовчи, мумкин эмаслигини била туриб, нега машинангизнинг ойналарини қорайтириб олдингиз?

— Чунки мен машинани ёмон ҳайдайман!

— Нима, бу ёрдам берадими?

— Албатта, ким экан, деб қараганлардан уялиб, бекинаман!
***
Тиқилинч автобусда бир қиз оёғини босиб олган йигитга бақирди:

— Ҳайвон!

— Танишганимдан хурсандман!
***
Тадбиркор аёлнинг бизнес плани:

Эрдан пул ундириш!
***
— Бир нарсага ҳайронман, — деди аёл дугонасига. — Эркаклар бизга аввалига ширинлик, турли-туман шоколадлар совға қилишади-да, кейин ўзлари “Нега семириб кетаяпсан?” деб ҳайрон бўлишади. Ундан кўра фақат бриллиант зираклар совға қилишсин, ярақлаб юрайлик!..

Манба: tasvir.uz «Замин»ни Telegram’да ўқинг!