Улуғбек Бақоев: "Бугун мувозанатни тенглаштириб, очко ишладик. "Пахтакор" эса очко йўқотди"

Суперлига 14-туридан ўрин олган "Сўғдиёна" - "Пахтакор" учрашуви якунига етди. Унда жамоалар 2:2 ҳисобида дуранг қайд этди.

Тошкент клуби сафида голлар Собирхўжаев ва Черан номига қайд этилди. Мезбонлар таркибида Колакович ва Норхонов гол муаллифи бўлди.

Учрашувдан сўнг ҳар иккала жамоа бош мураббийлари иштирокида матбуот анжумани бўлиб ўтди. Қуйида жиззахликлар устози Улуғбек Бақоевнинг фикрлари билан танишинг:

- Кўрдингиз, ўйинни ёмон бошладик. Билмадим, бу нима билан боғлиқ. Тезкорлик билан иккита гол ўтказиб юбордик ва ўйинни қутқариш керак эди. Зудлик билан 3 та ўзгариш амалга оширдим. Мазкур қарорим билан кимнидир хафа қилмоқчи эмасдим. Баъзида футболда бунақаси бўлиб туради. Шунга қарамай, биз ўйинни қутқариб қолдик. Йигитларни табриклайман. Улар сўнгги дақиқаларгача курашди. Шунингдек, уларни қўллаб-қувватлаб турган мухлисларга ҳам раҳмат.

- Дастлаб, ўйинга мослаша олмадик. Бироз бўшроқ ҳаракат қилганимиз учун иккита гол қабул қилиб олдик. "Пахтакор"дек жамоага қарши бунақа ўйнаб бўлмайди. Унутмаслигингиз керак, биз амалдаги Ўзбекистон чемпионига қарши тўп тепдик. Улар жуда ҳам кучли ва сифатли ижрочиларга эга. Бундай жамоага қарши беллашувда 2:0 ҳисобида ютқазаётган пайтимизда мувозанатни тенглаштириб, очко ишладик. "Пахтакор" эса очко йўқотди. “Замин” янгиликларини “Инстаграм”да кузатиб боринг