Ўзбек футболининг энг ёрқин ўйин кўрсатаётган ёш футболчиларидан Аббосбек Файзуллаев “Пахтакор”ни тарк этиб, фаолиятини Мосвканинг ЦСКА жамоасида давом эттиришга қарор қилди.
Табиийки, 19 ёшли ҳужумкор футболчини Россия Премьер-лигасида ҳали кўпчилик танимайди, у ном қозониб улгурмаган. Шу боис, россиялик футбол экспертлари ва спорт турларини ёритаётган турли манбалар ўзбекистонлик ўйинчи ҳақида маълумотлар тўплаш ва уни мухлисларга танитишга киришиб кетди.
Дзен платформасида Россия Премьер-лигасидаги трансферларни муҳокамаси қилаётган манбалар Аббосбек Файзуллаевнинг кучли томонлари ва ЦСКА мураббийлар штаби эътибор қаратиши ва ўргатиши керак бўлган жиҳатлар ҳақида маълумотларни эълон қилди.
Футболчи ҳақида:
➤ Аббосбек Файзуллаев 2021 йилнинг май ойида 18 ёшида Ўзбекистон Суперлигасида ўзини тарбиялаган “Пахтакор” жамоаси сафида дебют қилди. 2021/2022 йиьги мавсумда 26 та учрашувда қатнашиб, 8 та гол ва иккита голли пас муаллифи бўлди.
➤Аббосбек Файзуллаев катта клублар эътиборига 20 ёшгача бўлган футболчилар ўртасидаги Осиё чемпионатида тушди. Ҳужумкор футболчи Ўзбекистон терма жамоасининг яққол етакчиси сифатида кўзга ташлана бошлади.
➤Мусобақа якунида Ўзбекистон футболчилари бош совринни қўлга киритди. Аббосбек Файзуллаев турнирнинг энг яхши футболчиси бўлди.
➤Жорий мавсумда Файзуллаев “Пахтакор” сафида олтита ўйинда қатнашиб, рақиблар дарвозасини икки маротаба ишғол қилди ва бир марта жамоадошига голли пас узатди.
Файзуллаевнинг кучли томони:
➤ Универсаллиги. Ёш ҳужумкор футболчи ўнг қанотдан ҳам, чап томондан ҳам ҳужум уюштира олади. Марказда ярим ҳимоячи вазифасини ҳам уддалай олади.
➤ Дриблинг ва техника. Аббосбек Файзуллаевнинг бўйи баланд эмас ва ихчам ўйинчи. Бу унга ҳаракатлар йўналишини тез ўзгартириш, кўп томонлама ҳаракат қилиш имконини беради.
➤ Тезкорлик. Файзуллаев жисмоний томондан тезкор. Шунингдек, майдонда тез ўйлаб, кутилмаган қарорлар чиқара олади.
➤ Аниқ пас. Аббосбек нафақат қисқа пасларни, балки узоқ масофадан аниқ тўп узатишнинг ҳадисини олган. “Пахтакор”да ҳам, терма жамоада ҳам стандарт вазиятларда тўп олдига айнан у келади.
Файзуллаевнинг камчилиги:
➤Тактик кўникмалар. Аббосбек ҳали жуда ёш. 19 ёшли футболчи позицион ўйин ва ҳаракат йўналишларини тўғри аниқлашни ўрганиши керак.
➤ Бош билан ўйнаш. Тана тузилиш ва бўй-басти Файзуллаевга иккинчи қаватдаги курашларда устунлик бермайди. Бироқ, Аббосбек бу камчилигини бўйдор жамоадошларига турли масофалардан аниқ ва қулай пас узатиш билан ёпиб юборади.
Хулоса:
➤ ЦСКА майдон марказида ва ҳар икки қанот ҳужуми учун қобилиятли ўйинчига эга бўлади. Айрим футболчилар жароҳат олиб, сафдан чиққан паллада Файзуллаев бир неча позициядаги бўшлиқларни ёпа олади.
➤ Файзуллаев майдонда ҳимоя ва ҳужум чизиғини боғлаб туришга қодир ўйинчи. Бунда унга майдонни яхши кўра олиши, ўйинни тўғри ўқиши ва турли нуқталардан аниқ пас ошира олиши қўл келади.
