Ҳусанов энг зўрлар қаторида “Golden Boy – 2024” совринига даъвогар

Football Benchmark индекси бўйича Европанинг 21 ёшгача бўлган энг яхши футболчисига бериладиган “Golden Boy – 2024” совринига даъвогар рўйхати эълон қилинди.

Ушбу рейтинг истеъдодли ёш футболчиларнинг 2023 йилнинг 3 октябридан 2024 йилнинг 27 мартига қадар қайд этган кўрсаткичлари асосида шакллантирилади.

Бу йилги рейтингда “Барселона”нинг 16 ёшли испаниялик юлдузи Ламин Ямал етакчилик қилмоқда.

Иккинчи ўринда “Бенфика”нинг португалиялик истеъдодли футболчиси Жоау Невеш қайд этилган.

Кучли учликни “Манчестер Юнайтед”да порлай бошлаган аргентиналик ҳужумкор футболчи Алехандро Гарначо якунлаб турибди.

Рўйхатнинг дастлабки ўнта поғонасидан юқорида номи келтирилган уч футболчидан ташқари Уоррен Заир-Эмери (ПСЖ, Франция), Лени Йоро (“Лилль”, Франция), Савио (“Жирона”, Бразилия), Кобби Мейну (“Манчестер Юнайтед”, Англия), Рико Льюис (“Манчестер Сити”, Англия), Йоррел Хато (“Аякс”, Нидерландия) ҳамда Артур Вермерен (“Атлетико” Мадрид, Бельгия) ўрин олган.

Эътиборли жиҳати, “Golden Boy – 2024” совринига даъвогар бўлган юз нафар энг истеъдодли футболчилар рўйхатига кучли бешлик чемпионатларидаги вакилимиз Абдуқодир Ҳусанов ҳам киритилган.

“Ланс”нинг 20 ёшли марказий ҳимоячиси рўйхатнинг 73-поғонасида қайд этилган.

Ҳусанов “Бунёдкор” академияси тарбияланувчиси ҳисобланади. Профессионал фаолиятини Беларуснинг “Энергетик-БГУ” жамоасида бошлаган.

Абдуқодир 2023 йилнинг ёзида Франция вице-чемпиони “Ланс” жамоасига кўчиб ўтди. Европа футболига қадам қўйган ҳимоячи жорий мавсум давомида Франция чемпионатида ўнта, УЕФА таснифидаги энг нуфузли икки мусобақа – Чемпионлар лигаси ва Европа Лигасида иккитадан учрашувда иштирок этди.

Шунингдек, Абдуқодир Ҳусанов ўтган ёздан бошлаб, Ўзбекистон миллий терма жамоасига жалб қилинмоқда ва ҳозиргача халқаро миқёсда 12 та ўйинда тўп тепди. “Замин” янгиликларини “Facebook”да кузатиб боринг