Рўзиқул Бердиев: "Бунёдкор" 8-1 тактик схемасида ўйнади"

Суперлиганинг 7-туридан ўрин олган "Насаф" - "Бунёдкор" (0:0) учрашувидан сўнг мезбонлар бош мураббийи Рўзиқул Бердиев матбуот анжуманида иштирок этди.

Ўйин ҳақида
- Учрашувни кўрдинглар, рақиб чуқур ҳимояланди. Вазиятлар ҳақида гапирмоқчи эмасман, кўплаб ҳужумлар ташкил этдик. Гол уриш учун имкониятларимиз бўлди, бироқ ҳимояда яхши турди. Шунингдек, "Бунёдкор" дарвозабони кўрсатган ўйинни ҳам алоҳида айтиб ўтиб кетиш керак. Бугун улар биздан очко тортиб олишни уддалашди, режаларини буза олмадик.

- Шароф Муҳитдиновда вазиятлар бўлди, бироқ унинг зарбалари ноаниқ чиқди. Ўйин давомида бошқа футболчиларда ҳам шу каби ҳолатлар кузатилди. Бу нима билан боғлиқ?
- Барча зарбаларимиз ҳам ноаниқ кетди деб айта олмайман. Кўплаб ҳужумлар ташкил этдик, дарвоза томон аниқ зарбалар ҳам йўлладик. Бироқ рақиб ҳимояда яхши турди, дарвозабон қутқарган вазиятлар ҳам бўлди.

- Бразилиялик легионер Да Сильва кўп ўйинларда заҳирада қолаяпти. Унинг трансфери омадсиз чиқдими?
- Заҳирада фақат у эмас, бошқалар ҳам бор. Бир футболчига боғлаш керакмас. Натижаларимиз ёмон бўлганида трансфер омадсиз баҳоланса бўлади. Биз ҳар доим ўйинга 100 фоиз тайёр бўлган футболчини асосий таркибга киритамиз. Да Сильва бизнинг чемпионатга мослашиши учун вақт керак.

- ОКМК билан ўйинда 4 талаб гол урган "Насаф" бугун негадир гол ура олмади. Бунга нима сабаб бўлди деб ҳисоблайсиз?
- Олмалиқ билан ўйинда очиқ футбол эди. Бугун кўрдингиз, рақиб чуқур ҳимояланди. Қизил карточкадан сўнг 8-1 тактик схемасида ўйнашди. Бундай жамоага гол уриш жуда қийин. “Замин” янгиликларини “Инстаграм”да кузатиб боринг