"Пахтакор"нинг ўйини мутахассис нигоҳида: "Менимча, ғалаба учун эмас, бир очкони сақлаб қолиш учун ўйнади"

“Пахтакор” клуби Дубайда Элит ОЧЛнинг 5-тур доирасида Эроннинг “Истиқлол” жамоасига қарши баҳс олиб борди. Нурсиз учрашувда голсиз дуранг қайд этилди. “Пахтакор” клубининг собиқ спорт директори Жаъфар Ирисметов мазкур беллашув борасидаги айрим саволларимизга жавоб қайтарди.

- “Пахтакор”нинг “Истиқлол”га қарши ўйини бунчалик зерикарли ўтишини кутмагандик. Сизда қандай таассурот қолдирди?
- Тўғри айтасиз, қанақа таассурот қолдириши мумкин? Жамоа жуда бўш ўйин кўрсатди. “Истиқлол” ҳам бўш жамоа экан. Шунинг учун менимча Эрон чемпионатида адашмасам 10-ўринда. “Пахтакор”га келсак, етакчиларнинг йўқлиги билинди. Драган Черан ва Сардор Собирхўжаев барибир жамоани юраги эди. Бу клубни ички иши, бунга ҳеч ким аралаша олмайди. Нима бўлганда ҳам иккита етакчи етишмади, деб ўйлайман.

- Жамоа ғалаба учун ўйнади, дея оласизми?
- Биринчи таймда прессинг қилишди, яхши ўйин кўрсатишаётганди. Иккинчи бўлимда деярли 45 дақиқа орқада ўйнашди. Менимча, ғалаба учун эмас, бир очкони сақлаб қолиш учун ўйнади. Иккинчи бўлимда деярли ҳужум қилмади ва ғалаба учун ҳеч нима қилишмади, десак ҳам бўлади.

- Умуман, Шацкихни Черан билан муносабати ҳақида нима деган бўлардингиз? Балки Черан бўлганида бошқача бўлармиди?!
- Шацких билан Черан ўртасида нима бўлган, алоқаси қанақа, билмайман. Албатта, Черан бўлганида “Пахтакор” бошқача ўйин кўрсатарди, деб ўйлайман. Драган бундай учрашувларда ўйин тақдирини ҳал қила оларди, назаримда. Бу каби учрашувларда битта ҳал қилувчи зарба керак бўларди. Афсуски, “Пахтакор”да ҳозирги пайтга келиб бундай футболчи йўқ.

- “Пахтакор”га Суперлигани медалларсиз ўтказгани ҳам ОЧЛдаги ушбу баҳс олдидан салбий таъсир кўрсатди, деб ўйлайсизми?
- Ўйлашимча, медалларсиз қолгани салбий таъсир кўрсатди, деб ҳисобламайман. Чунки бу ОЧЛ, бу Ўзбекистонни юзи. Буни майдонга чиқаётган футболчилар ҳис қилиши, ўзини кўрсатишга ҳаракат қилиши керак. Барибир ОЧЛ катта бозор. Қанчалик яхши ўйин кўрсатишса, футболчиларга шунчалик яхши клублардан таклифлар тушиши мумкин. Бироқ бирор-бир футболчини яхши ўйнади, деб айтиш қийин.

- Шацкихни яна клубга қайтганига фикрингиз қандай? Кўпчилик четдан мураббий келишини кутмоқда...
- Авваламбор Шацкихни расман ҳеч ким кетди, деб эълон қилмаган. Шартномаси бор, уни бажариш керак. Қайтиб келган. Бирор сабаб бўлгандир. Ҳаммаси клубни ички иши. Балки касал бўлиб қолгандир. Нима бўлганини билмаймиз. Четдан мураббий келса яхши. Лекин келган тақдирда ҳам материал бўлиши лозим. Агар материал бўлмаса четдан келган мураббий билан нимани ҳал қилса бўлади? Барибир хорижлик мутахассисга ҳам ўйинчилар керак бўлади-ку! “Замин” янгиликларини “Telegram”да кузатиб боринг