Леонарду Жардим: "Пахтакор" биринчи бўлимда яхшироқ ҳаракатланди. Имкониятларимиз камайиб кетди"

Осиё Элит Чемпионлар лигаси 6-туридан ўрин олган "Пахтакор" - "Ал Айн" (1:1) баҳсидан сўнг БАА жамоаси бош мураббийи Леонарду Жардим ўйиндан кейинги матбуот анжуманида иштирок этди ва ўйин ҳақида қуйидаги фикрларни билдирди.

"Биринчи 45 дақиқаликда жамоам яхши ўйин намойиш эта олмади. Биз агрессив ўйин намойиш эта олмадик. Бу менга ёқмади. Рақибга деярли қаршилик кўрсатмадик ва яккакурашларда мағлуб бўлдик. Танаффусда футболчилар билан гаплашиб олдим ва "Ал Айн" яхшироқ ўйнаш кераклигини айтдим. Иккинчи таймда эса рақибга яхши қаршилик кўрсатдик. Ҳимояда ва ҳужумда кўпроқ тўпга эгалик қилишимиз керак эди. Четлатишдан сўнг ҳам биз ғалаба қозонишга интилдик. Футболчиларим курашишда давом этди. Мен сўнгги сонияга қадар курашишни ёқтираман. Биз бугун ғалаба қозонишни мақсад қилгандик. Афсуски, бугун икки очко йўқотдик ва олдинда фақатгина иккита баҳс қолди. Имкониятларимиз камайиб кетди. Энди биз бошқа жамоаларнинг натижаларига боғланиб қолдик.

- Дуранг натижаси бугунги ўйин учун адолатли натижа бўлди деб ўйлайсизми? Икки жамоа ҳам ҳисобни йириклаштириш учун етарлича имкониятларга эга бўлишди.
- "Пахтакор" биринчи бўлимда фаолроқ эди ва улар кўпроқ гол уришлари мумкин эди. Танаффусдан сўнг эса бизда имкониятлар пайдо бўла бошлади. Дуранг натижаси ўйинга мос бўлди деб ўйлайман.

- "Ал Айн" қизил карточкадан сўнг ўйинни кучайтира олди. Четлатиш футболчиларингизга яхши таъсир қилди деб ўйлайсизми?
- Йўқ. Биз иккинчи таймга бошқача ёндашув билан майдонга тушдик. Футболдаги энг муҳим омиллардан бири - хоҳиш. Кучли истаксиз катта натижаларга эришиб бўлмайди. Биз иккинчи таймда янада кўпроқ иштиёқ билан курашдик. Баҳс сўнгида Куаме ажойиб вазиятга эга бўлди, аммо рақиб дарвозабони жуда яхши ҳаракат қилди деб айта оламан.

- Тошкентдаги совуқ об-ҳаво жамоангизга қандай таъсир ўтказди? Футболчиларингиз учун бундай иқлимда футбол ўйнаш қийин бўлмадими?
- Об-ҳаво катта таъсир ўтказди демайман. Ҳаво бироз совуқ бўлгандир, аммо бундай иқлим футбол ўйнаш учун жуда қулай, менимча. Мен кўпроқ майдон ҳолати ҳақида гапиришим мумкин. Элит Чемпионлар лигаси учун майдон ҳолати яхшироқ бўлиши керак деб ўйлайман. Балки "Пахтакор"да бошқа майдон йўқдир, лекин бундай мусобақада иштирок этаётган жамоаларга яхшироқ майдон тақдим этилиши керак. Майдон ҳолати бугунги натижа учун баҳона бўла олмаслиги аниқ. “Замин” янгиликларини “Одноклассники”да кузатиб боринг