Ўзбекистон футзал федерациясига янги президент тайинланди

Тошкентда 25 декабрь куни Ўзбекистон футзал федерациясининг тақдимот маросими ўтказилди.

^{Фото: ЎФА}
Тадбир аввалида ЎФА ҳамда ЎзПФЛ футзални ривожлантиришни янги босқичга олиб чиқиш, шунингдек, мини-футбол ва соҳил футболини аҳоли орасида оммалаштириш ва ривожлантириш мақсадида уларни ягона тузилмага бирлаштиришга қарор қилингани қайд этилди.

^{Фото: ЎФА}
ЎФА бош котиби Аваз Максумовнинг маълум қилишича, Ўзбекистон футзал федерациясининг Устав лойиҳаси ҳамда Ижроия қўмита аъзолари тасдиқланган. Шундан сўнг, ташкилотнинг таъсис ҳужжатлари белгиланган тартибда Адлия вазирлигидан рўйхатдан ўтказиш учун тақдим этилган.

^{Фото: ЎФА}
2025 йилдан фаолиятини бошлайдиган Ўзбекистон футзал федерацияси президенти этиб БМБ Ҳолдинг кузатув кенгаши раиси Бекзод Маматқулов номзоди маъқулланди. Жумладан, федерацияда:

^{Фото: ЎФА}
- Бекзод Маматқулов — федерация президенти;
- Азиз Акбаржонов — вице-президент;
- Маъруфжон Абдуллаев — бош котиб.

Тадбир давомида футзал бўйича терма жамоамизнинг кейинги Жаҳон чемпионатларида муносиб иштирок этишига тилак билдирилди.