“Аббосбек Файзуллаевни қийнаётган бош мураббий ҳали ишдан олинади!”

Россиялик таниқли футбол агенти Дмитрий Селюк Москванинг машҳур клублари – ЦСКА ва “Динамо” миллий чемпионатда муваффақиятга эришиши учун бош мураббийларни ўзгартириши лозимлигини таъкидлади.

Россия Премьер-лигасининг 19-туридан кейин хорватиялик мутахассис Марцел Личка бошчилигидаги “динамочилар” мусобақа жадвалида тўртинчи ўринни эгаллаб турган бўлса, сербиялик Марко Николич устозлик қилаётган ЦСКА футболчилари ҳали ҳамон олтинчи поғонадан кўтарила олгани йўқ.

- Илгари ЦСКА учун иккинчи ўрин ҳам мағлубият ҳисобланар эди. Ҳозир эса, “армиячилар” олтинчи поғонага ҳам кўникиб қолди. Николич келганидан кейин нима қилди? Ҳеч нарса!

Бу мутахассис жамоада Миралим Пьянич учун ромб схемасини жорий қилишга уриняпти. Бир “югослав” бошқа югославга жой очяпти (Сербия ва Босния илгари собиқ Югославия таркибида бўлган – изоҳ sports.uz). Бундан энг кўп Аббосбек Файзуллаев зиён кўрмоқда, шунингдек, бошқа футболчилар ҳам. Бу кетишда уларнинг якуний натижаси олтинчи ўрин бўлиб қолаверади.

Мен Марко Николични ҳали бош мураббийликдан олиб ташлашларига аминман. Марцел Личкани ҳам. ЦСКА ва “Динамо”га яхши мураббий керак холос. Масалан, Франк Артигага эътибор қаратишсин. Бу мутахассис ёзда талаш бўлади. У ёш ва истеъдодли футболчиларни ривожлантира олади. Худди шу ишни “Барселона” тизимида ҳам уддалаган, - деди Дмитрий Селюк.

ЦСКАга катта умидлар билант олиб келинган Марко Николичнинг ЦСКАда ўзи қўллаётган янги ўйин схемаси бўйича фикри умуман бошқача. Сербиялик мутахассис у жамоага сингдираётган ромб усули Аббосбек Файзуллаевга мос тушишини таъкидлаяпти.

- Ташқаридан 8-рақам позициясида ўйнаётган Аббосбек Файзуллаевга янги схемада қийин бўлаётганидек туюлиши мумкин. Чунки у аввалгига қараганда кўпроқ ҳимояланишига тўғри келяпти ва бунга кўп вақт сарфлаяпти.

Менга эса, бундай туюлгани йўқ. Замонавий футболчилар ҳужум уюштиришни ҳам, ҳимояланиш кўникмаларини ҳам ривожлантириб бориши шарт.

Аббос кўп ҳаракат қилади ва жуда катта ҳажмдаги ишни бажармоқда. Шуни айтишим мумкинки, йиғинларда машғулотларга киришишдан аввал чидамлилик бўйича тестлар ўтказилди. ЦСКАнинг барча ўйинчилари орасида бу борада айнан Аббосбек Файзуллаев биринчи ўринни эгаллади.

У ҳамон жамоанинг ўткир ҳужумларида иштирок этмоқда, имкон бўлиши билан хавфли вазиятларни юзага келтиряпти. Бу схемада Аббос янада кучайишига аминман.

Аббосдан нималарни кутаётганимиз ҳақида ўзи билан гаплашдим. У албатта ўсишга эришадиган жуда иқтидорли футболчи. Бир кун келиб, Европанинг топ-клубида пайдо бўлади, - деди Марко Николич.

“Пахтакор” тарбияланувчиси бўлган Аббосбек Файзуллаев 2023 йилнинг ёзидан бери ЦСКА шарафини ҳимоя қилиб келмоқда. Transfermarkt портали томонидан 8 миллион еврога баҳоланаётган ҳужумкор легионеримиз “армиячилар” сафига қўшилганидан бери 56 та учрашувда майдонга тушиб, ўз ҳисобига саккизта гол ва 20 та ассист ёздириб қўйди. “Замин” янгиликларини “Telegram”да кузатиб боринг