Раньери: “Бу ўйинда асосий мақсад — мағлубиятдан қочиш эди”

Кеча бўлиб ўтган баҳсда “Рома” жиддий рақибга қарши майдонга тушди ва кўпчилик ушбу тўқнашувда жамоанинг қандай ҳаракат қилиши билан қизиқди. Учрашувдан сўнг жамоа бош мураббийи Клаудио Раньери матбуот анжуманида фикрлари билан ўртоқлашди.

“Мен болалардан мамнунман. Биз бундай ўйин бўлишини олдиндан кутгандик — буни матбуот анжуманида ҳам айтган эдим. Шу боис рақибнинг босими биз учун кутилмаган ҳолат эмас эди,” — деди тажрибали мутахассис.

Раньери рақиб босимига қарамай жамоанинг жавоб қайтаришга бўлган интилишини алоҳида таъкидлаб ўтди:

“Бизнинг режамиз ҳар бир зарбага зарба билан жавоб бериш эди. Афсуски, дастлабки 20 дақиқада бу ишни уддалай олмадик. Бироқ кейинги 20 дақиқада яхши ҳаракат қилдик — Нико Гонсалеснинг бош билан йўллаган тўпи тўсиндан қайтди, Кристанте эса гол уришга яқин бўлди.”

Бироқ ҳужумлар гол билан якунланмагани Раньерини аламлантиргани сезилди:

“Гол уриш ўрнига бўлим сўнгида гол ўтказиб юбордик — бу албатта жуда аламли эди.”

Шу билан бирга, мураббий иккинчи бўлимда жамоа қандай ҳаракат қилганидан мамнун эканини билдирди:

“Бахтимизга иккинчи бўлим аввалида ҳисобни тенглаштирдик. Кейин ғалаба учун ҳаракат қилдик, аммо асосий мақсад — мағлуб бўлмаслик эди. Шу жиҳатдан қараганда, жамоа ўзига юклатилган вазифани бажарди.”

Матбуот анжумани якунида Раньери футболчиларининг руҳий тайёргарлиги ва жанговар кайфиятини алоҳида таъкидлади:

“Бугунги ўйиндаги футболчиларимнинг ҳаракатларидан тўлиқ мамнунман. Улар охирги дақиқаларгача курашишди. Бу мен учун жуда муҳим.” “Замин” янгиликларини “Telegram”да кузатиб боринг