“Манчестер Сити” ёзда жиддий ўзгаришларга қўл уради: Грилиш жамоадан кетиш ниятидан воз кечди

“Манчестер Сити” раҳбарияти келгуси мавсум олдидан таркибни сезиларли даражада янгилашни режалаштирмоқда. Трансферлар янги йил бошида бошлаб юборилган бўлса-да, асосий ўзгаришлар ёзги трансфер ойнаси вақтида рўй беради.

Жамоанинг ёши каттароқ бўлган футболчиларига эса янги иш жойини қидириш тавсия қилинмоқда. Хусусан, жамоанинг тажрибали ҳимоячиси Кайл Уокер январь ойидаёқ жамоа билан хайрлашди. Клубнинг асосий юлдузларидан бири ҳисобланган Кевин де Брюйне эса июнь ойида “шаҳарликлар” таркибидан кетиши аниқ бўлди.

Шунингдек, узоқ вақт давомида таркибдаги ўрни сўроқ остида бўлган Жек Грилишнинг ҳам кетиши кутилаётганди. Бироқ инглиз ярим ҳимоячиси бу қароридан воз кечишга қарор қилди. Бунга асосий сабаб сифатида футболчининг юқори маоши кўрсатилмоқда. Грилишга “Тоттенхэм” ҳамда унинг собиқ клуби “Астон Вилла” қизиқиш билдирмоқда, лекин улар футболчига “Манчестер Сити” тўлаётган катта маошни таклиф қилолмайди.

Айнан шу сабабдан 29 ёшли ҳужумкор ярим ҳимоячи клуб билан тузилган шартномаси охиригача “шаҳарликлар” сафида қолишни ният қилган.

Эслатиб ўтамиз, “Манчестер Сити” Жек Грилишни 2021 йилнинг ёзида “Астон Вилла”дан рекорд суммаси – 117,5 миллион евро эвазига трансфер қилганди. Айни пайтда Transfermarkt томонидан 35 миллион еврога баҳоланаётган футболчи клуб билан 2027 йил ёзигача шартномага эга.

Ҳозирги ўзгаришлар орқали клуб янги авлод футболчилари билан жамоани кучайтиришни ва яна бир бор совринлар учун курашга киришишни мақсад қилган. “Манчестер Сити” раҳбариятининг режаси мухлисларда катта қизиқиш уйғотмоқда. «Замин»ни Telegram’да ўқинг!