Арне Слот «Ливерпуль»ни муддатидан олдин чемпион қилди: Англия футболида янги тарих ёзилди!

«Ливерпуль» Англия Премьер-лигаси 35-тури доирасида ўз уйида «Тоттенхэм» жамоасини йирик 5:1 ҳисобида енгиб, чемпионлик унвонини муддатидан аввал нақд қилди.

27 апрель куни бўлиб ўтган учрашувдан кейин мерсисайдликлар жами 82 очко билан турнир жадвалида энг яқин таъқибчиларидан сезиларли даражада олдинга чиқиб, биринчи ўринни кафолатлади.

Бу чемпионлик «Ливерпуль» бош мураббийи, нидерландиялик Арне Слот учун ҳам Англия футболидаги илк соврин сифатида тарихга кирди. Эътиборлиси, Слот Англия Премьер-лигасида ғалаба қозонган биринчи нидерландиялик мураббийга айланди. У жамоа бошқарувига 2024 йилнинг ёзида келганди.

Эслатиб ўтамиз, «Ливерпуль» бундан аввал чемпионлик унвонини 2019/20 йилги мавсумда Юрген Клопп раҳбарлигида қўлга киритган эди. Арне Слотнинг тайинланиши билан жамоа қайтадан юқори чўққига кўтарилиб, бутун мавсум давомида юқори суръатли ва ишончли ўйини билан барчанинг эътиборини ўзига жалб этди.

Шундай қилиб, «Ливерпуль» мухлислари орзиқиб кутаётган чемпионлик нишонланмоқда. Арне Слот эса Англия футболидаги ўзининг янги саҳифасини ғалаба билан бошлади. «Замин»ни Telegram’да ўқинг!