Жозе Моуриньо илк марта терма жамоада иш бошлаши мумкин

Жаҳон футболидаги энг машҳур ва муваффақиятли мураббийлардан бири ҳисобланмиш Жозе Моуриньо ўз мураббийлик фаолияти давомида кўплаб нуфузли клубларда ишлаган. У Португалияда «Порту», Испанияда «Реал Мадрид», Англияда «Челси», «Манчестер Юнайтед», Италияда «Интер», «Рома» ҳамда Туркияда «Фенербаҳче» клубларига мураббийлик қилган.

Бироқ, 62 ёшли португалиялик таниқли мутахассис шу вақтга қадар бирор марта ҳам миллий терма жамоаларни бошқармаган эди. Энди эса унинг мураббийлик фаолиятидаги янги ва муҳим босқич бошланиши мумкин.

Fichajes нашрининг маълумотига кўра, Португалия футбол федерацияси Жозе Моуриньони терма жамоа бош мураббийлигига тайинлаш бўйича музокараларни бошлаб юборган. Федерация 2026 йилда бўлиб ўтадиган Жаҳон чемпионатида миллий жамоани айнан Моуриньога ишониб топширишни режалаштирган.

Маълумки, Моуриньо бир неча марта Португалия терма жамоасига устозлик қилиш унинг энг катта орзуларидан бири эканлигини очиқчасига таъкидлаган. Ҳозирда Туркиянинг «Фенербаҳче» жамоасида фаолият олиб бораётган мутахассис учун энди бу орзу амалга ошиши мумкинлиги ҳақида гапирилмоқда.

Португалия футболи раҳбарлари бугунги кунда Моуриньони терма жамоага жалб этиш учун идеал вариантларни кўриб чиқишмоқда. Улар тажрибали мутахассис билан музокараларни муваффақиятли якунлаш ва уни миллий терма жамоага олиб келиш учун барча зарурий шарт-шароитларни яратишга тайёр туришибди.

Агар бу келишув рўёбга чиқса, Жозе Моуриньо ўзининг бой тажрибасини биринчи марта миллий терма жамоада қўллаш имконига эга бўлади. Бу эса нафақат мураббийнинг шахсий орзусини рўёбга чиқаради, балки Португалия терма жамоасининг келажакдаги муваффақиятлари учун ҳам муҳим қадам бўлиши мумкин. «Замин»ни Telegram’да ўқинг!