«Бавария» муддатидан олдин Бундеслига чемпионлигини нишонлади, Харри Кейнда илк соврин...

Германия Бундеслигаси 32-тури доирасида бўлиб ўтган "Фрайбург" ва "Байер" учрашуви "Бавария" клубининг навбатдаги чемпионлигига йўл очди. Беллашув 2:2 ҳисобидаги дуранг натижа билан якунланди.

"Фрайбург" ўз майдонида ўйинни жуда яхши бошлади ва 44-дақиқада Максимилиан Эггештайннинг голи билан олдинга чиқди. Иккинчи бўлим бошида, 48-дақиқада меҳмонлар ҳимоячиси Пьеро Инкапиэ тўпни ўз дарвозасига йўллаб қўйди ва ҳисоб 2:0 кўринишига келди.

Аммо леверкузенликлар мағлубиятга рози бўлишни истамади. "Байер" етакчиси Флориан Вирц 82-дақиқада ҳисобни қисқартирди. Ўйин сўнггида эса, 90+3-дақиқада Жонатан Та ҳисобни тенглаштиришга муваффақ бўлди. Бироқ, "Байер" ғалаба қозона олмади ва бу билан чемпионлик учун курашдан чиқиб кетди.

Бу натижа ортидан, "Бавария" муддатидан аввал 34-марта Германия чемпионлигини расман нишонлаш имкониятига эга бўлди. "Бавария" сўнгги мавсумда чемпионликни қўлга кирита олмаган эди, шу тариқа мюнхенликлар яна ўз тахтига қайтишди.

Эътиборли томони, бу мавсум «Бавария» сафига келиб қўшилган инглиз ҳужумчиси Харри Кейн учун ҳам муҳим аҳамият касб этди. Кейн ушбу соврин билан ўз фаолиятидаги биринчи катта ғалабасини нишонлади ва жамоасининг асосий тўпурари сифатида тарихда қолди.

Мюнхен клуби бу мавсумда ҳам жуда кучли ва ишончли ўйин намойиш этди. Хави Алонсо бошчилигидаги «Байер» эса умидини йўқотмасдан, чемпионлик учун шиддатли кураш олиб борди, аммо бу ўйиндаги дуранг натижа уларнинг чемпионлик имкониятини батамом барбод қилди. «Замин»ни Telegram’да ўқинг!