Аббосбек Файзуллаев ЦСКАдаги илк совринига яқин: Ўзбек легионерининг "ромб" услубидаги муваффақияти!

Россия футболида ўзини кўрсатаётган ўзбек иқтидори, ёш ва маҳоратли футболчи Аббосбек Файзуллаев учун 2024/25 йилги мавсум ўзгача ва эсда қоларли кечмоқда. "Пахтакор"дан Москва клуби ЦСКА сафига кўчиб ўтган ҳамюртимиз айни пайтда ўзининг легионер сифатидаги илк катта совринини қўлга киритиш арафасида турибди.

Янги мавсумнинг биринчи қисмида кўнгилдагидек натижалар қайд эта олмаган "армиячилар" декабрь ойида сербиялик мураббий Марко Николични бош мураббий этиб тайинлаган эди. Николич қишки танаффус пайтида жамоанинг ўйин услубини тубдан ўзгартирди. Хусусан, клуб тактик жиҳатдан мураккаб ва фаол ҳаракат талаб қилувчи "ромб" схемасига ўтказилди.

Бу тактик ўзгаришда асосий масъулият айнан Аббосбек Файзуллаев зиммасига юкланди. Авваллари кўпроқ қанот ҳужумчиси сифатида кўриниш берган ўзбекистонлик ёш футболчи, энди майдон марказида ҳам ҳужум ташкил қилиш, ҳам ҳимояга ёрдам бериш каби бир нечта вазифаларни бир вақтда бажармоқда. Бу рол жисмоний чидамлилик ва юқори иш қобилиятини талаб этади.

Марко Николич ушбу муҳим ва мураккаб вазифани айнан Аббосбекка топшириш сабабини махсус тестларда ҳамюртимиз энг юқори кўрсаткичларга эришгани билан изоҳлади. Тажрибали сербиялик мураббийнинг бу танлови ўзини тўла оқлади десак, муболаға бўлмайди.

Ҳақиқатан ҳам, янгича схемадаги ўзгаришлар жамоа натижаларига тезда ижобий таъсир кўрсата бошлади. Чемпионатнинг биринчи қисмини олтинчи ўринда якунлаган ЦСКА кейинги босқичда юқори самарадорлик кўрсатиб, кетма-кет ўн учрашувдан бери мағлубият нималигини билмаяпти. Ушбу муваффақиятли серия натижасида жамоа кучли учликдан жой олди. Март ойидан бери москваликлар еттита ғалаба ва учта дурангга эришди.

Бундан ташқари, ЦСКА Россия кубогида ҳам юқори натижаларни қўлга киритмоқда. Суперфиналга чиқиш учун курашда москваликларга амалдаги чемпион ва кубок соҳиби "Зенит" рақиблик қилди. Биринчи учрашувда 0:2 ҳисобида мағлуб бўлганига қарамасдан, жавоб учрашувида ЦСКА футболчилари юқори маҳорат ва иродани намойиш этиб, рақибларини худди шу ҳисобда мағлуб этди. Жарима зарбалари сериясида ҳам омад ЦСКА томонида бўлди ва шу тариқа жамоа Суперфиналга чиқишга муваффақ бўлди.

Учрашувдан кейин журналистлар билан мулоқотда Аббосбек Файзуллаев бугунги ўйин ҳақида ўз фикрларини билдирди.

«Кўпчилик бугунги ўйинни ЦСКАнинг мавсумдаги энг кучли ўйини, дея баҳолаяпти. Ҳа, мен ҳам бу фикрга қўшиламан. Лекин менимча, биз мавсумдаги энг яхши ўйинимизни Суперфиналда кўрсатамиз. Бу каби муҳитни тасвирлашга сўз ожиз», — деди Аббосбек.

Шу билан бирга, Аббосбек ўз мухлисларига алоҳида миннатдорлик билдириб, уларнинг қўллаб-қувватлаши ва ишончи жамоага катта куч бағишлаётганини таъкидлади.

Ёш ўзбек легионери бу мавсум Россия чемпионати ва кубогида 36 та учрашувда майдонга тушиб, 3 та гол ва 7 та ассист қайд этган. Албатта, янги позицияга ўтганидан кейин унинг шахсий статистикасида бироз пасайиш кузатилди, аммо бош мураббий Николич бу вазият вақтинчалик эканини, Аббосбек янги амплуага тўлиқ мослашиб олгач, унинг голлари ва голли узатмалари сони сезиларли даражада кўпайишини айтмоқда.

Россия кубогининг ҳал қилувчи Суперфинали 1 июнь куни Москвадаги афсонавий "Лужники" стадионида ўтказилади. ЦСКА футболчилари бу баҳсда «Ростов» ва «Спартак» ўртасида бўлиб ўтадиган иккинчи ярим финал ғолиби билан тўқнаш келади.

Zamin.uz таҳририяти Аббосбек Файзуллаев ва ЦСКА клубига мазкур тарихий баҳсда муваффақият тилайди ҳамда ўзбек футболи иқтидорларининг Европа ареналарида янги чўққиларни забт этишига ишонади! «Замин»ни Telegram’да ўқинг!