Витинья финал олдидан: «Бу тарих учун кураш бўлади»

ПСЖнинг тажрибали ярим ҳимоячиси Витинья Клублар ўртасидаги Жаҳон чемпионати финали арафасида муҳим баёнот билан чиқди. Португалиялик футболчи ФИФА матбуот хизматига берган интервьюсида бу ўйин Париж клуби учун қанчалик аҳамиятга эгалигини таъкидлади.

“Бизда мавсум якунланиш арафасида барча йўналишларда ғалаба қозониш имконияти бор. Клуб тарихида бундай фурсат ҳар доим ҳам юз бермайди. Шундай экан, ПСЖ бу имкониятдан фойдаланиши шарт. Финалда ғалаба қозониш — нафақат титул, балки бутун жамоа, мухлислар ва шаҳар учун улкан ифтихор манбаига айланади,” – деди Витинья.

Витиньянинг сўзлари Париж клуби сафидаги кайфиятни яққол ифода этди. Жамоа бугун ўзининг энг юқори нуқтасига яқинлашган: мавсум давомида "Атлетико Мадрид", "Интер Майами", "Бавария" ва "Реал Мадрид" каби гранд клублар устидан қозонган ғалабалар — Луис Энрике шогирдларининг қудратини исботлади.

Финал 13 июль, якшанба куни бўлиб ўтади. Парижликлар ҳал қилувчи баҳсда Англиянинг номдор клуби — “Челси”га қарши тўқнаш келади. Бу ўйин нафақат йилнинг, балки ПСЖ тарихининг энг муҳим воқеаларидан бирига айланиши мумкин.

Шу сабабдан Витиньянинг сўзлари тасодифий эмас. У жамоанинг ички муҳитини, кучли ишончни ва финалга бўлган жиддий тайёргарликни акс эттирди. Унинг таъкидлашича, жамоа ҳар бир титул учун, ҳар бир финал учун охиригача курашишга тайёр.

Энди барча диққат 13 июль кунида. Миллионлаб футбол ишқибозлари финалдаги ҳар бир ҳаракатни, ҳар бир зарбани, ҳар бир голни интиқлик билан кузатади. ПСЖ эса ғалаба орқали ўз номини янада мустаҳкамлаши мумкин. «Замин»ни Telegram’да ўқинг!