"Реал Мадрид" рекорд миқдорда даромад топиш билан тарих ёзди

Европа футболидаги энг барқарор ва даромадли клублардан бири ҳисобланган Мадриднинг машҳур "Реал" жамоаси 2024/25-молиявий мавсумига оид расмий ҳисоботини тақдим этди, деб хабар берди realmadrid.com.

Клуб эълон қилган рақамлар бир қарашдаёқ мухлислар ва экспертларни ҳайратга солиши табиий. Чунки бу ҳисобот орқали “қироллик клуби” нафақат спортда, балки молия соҳасида ҳам қандай юксак поғоналарни эгаллаганини яна бир бор намойиш этди.

Мадридликлар 2024/25-йилда ҳеч қандай трансферсиз, яъни футболчи сотувларидан даромад олмасдан туриб, 1 миллиард 185 миллион евро фойда кўрган. Бу ўтган йилги кўрсаткичдан тахминан 10 фоизга кўпроқ ва клуб тарихидаги мутлақ рекорд сифатида қайд этилди.

Бундай юқори даромад фонида "Реал"нинг соф фойдаси ҳам жиддий ўсишга эришди — 24,3 миллион евро. Бу кўрсаткич ўтган мавсумга нисбатан 56 фоизга ошиб, клубнинг иқтисодий фаолияти қанчалик самарали эканини кўрсатмоқда.

Эътиборга молик яна бир жиҳат — EBITDA кўрсаткичи. Бу солиқлар, фоизлар ва амортизация харажатларини инобатга олмаган ҳолдаги фойда миқдоридир. “Реал” учун бу рақам 242,9 миллион еврони ташкил қилган. Бу ҳам тарихий рекорд сифатида қайд этилди ва жамоа молиявий механизмларини қай даражада муваффақиятли йўлга қўйганини тасдиқлайди.

Ҳозирда клубнинг умумий соф капитали 598 миллион еврога етган. Қарз ва капитал ўртасидаги нисбат эса 0 га тенг — бу “Реал” деярли мутлақ қарзсиз ҳолатда эканини англатади.

Шу билан бирга, клубнинг стадиони — “Сантьяго Бернабеу”ни қайта қуриш мақсадида олинган кредитлардан ташқари, “Реал”нинг тоза қарзи бор-йўғи 12 миллион еврони ташкил этади. Бундай барқарорлик кўплаб етук клублар учун орзу бўлиб қолмоқда.

Кўриниб турибдики, “Реал Мадрид” нафақат майдонда, балки молиявий режаларда ҳам чемпионликка интилмоқда. Футболчилар, мухлислар ва инвесторлар учун бундай барқарорлик эса эртанги кунга ишонч ва илҳом бағишлайди. «Замин»ни Telegram’да ўқинг!