Европа грандлари орасида трансфер бўйича янги ва қизиқарли сценарий пайдо бўлди. Мадриднинг машҳур клуби — “Реал” таркибидаги ёш ва иқтидорли ҳужумчи Родригонинг тақдири борди-ю келдига тушмоқда. Бу ҳақда испаниялик инсайдерлар ва маҳаллий нашрлар, жумладан "Defensa Central" хабар тарқатди.
Маълум бўлишича, клубнинг яқинда тайинланган янги бош мураббийи Хаби Алонсо Жаҳон клублар чемпионатида бразилиялик вингерга етарлича имконият бермади. Унинг старт таркибдаги ўрни кўп ҳолларда бошқа футболчиларга насиб этди. Бу эса Родригонинг келгуси фаолияти мадридликлар сафида давом этишига оид саволларни кучайтирди.
“Қироллик клуби” ички рақобатни кучайтириш ва ҳимоя чизиғини янада барқарорлаштириш мақсадида катта трансфер вариантини муҳокама қилмоқда. Нашр маълумотига кўра, “Реал” раҳбарияти Родригони Лондоннинг “Арсенал” клуби ҳимоячиси Вильям Салибага алмаштириш ғоясини кўриб чиқмоқда. Ушбу трансфер орқали мадридликлар ўз ҳимоясида юқори даражадаги етакчини қўлга киритишни истамоқда.
Бироқ бу жараённинг амалга ошиши осон кечмаслиги мумкин. “Канонирлар” деб ном олаётган “Арсенал” клуби Салибани ўзининг узоқ муддатли лойиҳасининг муҳим қисмларидан бири деб ҳисоблайди. 24 ёшли француз футболчиси яқинда жамоа билан шартномасини янгилаш истагини билдирган ва ҳозирги келишуви 2027 йилнинг ёзига қадар амал қилади.
Ушбу ҳолатда “Реал”нинг қадами қанчалик жиддий экани ва “Арсенал” бу эҳтимолий таклифга қандай муносабатда бўлиши ҳозирча ноаниқ. Бир нарса аниқ — ҳар икки футболчи ҳам ўз позициясида юқори даражадаги маҳоратга эга ва уларнинг ўрин алмашиши футбол оламида катта шов-шув уйғотиши аниқ. Яқин ҳафталарда бу масала янада ойдинлашиши кутилмоқда.
«Замин»ни Telegram’да ўқинг!
