Франция чемпионати клублари катта лиганинг бошқа мамлакатлари ёки молиявий имкониятлари кенг бўлган давлатлар чемпионатларига кўплаб маҳоратли футболчиларни етказиб бериши билан ҳам танилган. Бундан ташқари, кўплаб жамоалар ўз молиявий имкониятларини айнан истеъдодли ижрочиларни сотиш ҳисобидан тўлдириб боради.
Шу жиҳатдан, Ўзбекистон миллий терма жамоаси марказий ҳимоячиси Абдуқодир Ҳусанов фаолият олиб борган «Ланс» клуби ҳам сўнгги йилларда трансфер бозорида катта даромад топаётган жамоалардан бири сифатида тилга олинмоқда.
Бу йилдаги энг йирик чиқиш трансфери сифатида Энди Диуфнинг «Интер»га ўтиши қайд этилди. Италия гранди 22 ёшли марказий ярим ҳимоячи учун 20 миллион евро тўлаб, яна 5 миллион евро бонус сифатида қўшиб беришга келишди.
Аслида, «Ланс» клуби бундан аввал ҳам йирик рекордларга эришганди. 2023 йилнинг 14 июнида клубнинг асосий ҳужумчиси Лои Опенда 40 миллион евро эвазига «Лейпциг» жамоасига йўл олди. Ундан бир йил аввал «Брюгге»дан 15,39 миллион еврога олиб келинган Опенда шундай қилиб клуб тарихидаги энг қиммат сотув сифатида қайд этилган эди.
Шунингдек, орадан бир ярим йил ўтиб, яна бир 40 миллион евролик трансфер амалга ошди. Бу сафар «Манчестер Сити» ўзбекистонлик легионер Абдуқодир Ҳусанов учун шу миқдорда маблағни «Ланс» клуби ҳисоб рақамига ўтказди.
Қизиғи шундаки, Ҳусанов учун «Ланс» бор-йўғи юз минг евро сарфлаб, уни «Энергетик-БГУ»дан олиб келганди. Атиги бир ярим йил ичида бу инвестиция клуб учун тўрт юз баравар фойда келтирди ва ҳимоячи клуб тарихидаги энг катта даромад келтирган футболчига айланди.
Шу тариқа, Лои Опенда ва Абдуқодир Ҳусанов «Ланс» тарихидаги энг қиммат сотилган ўйинчилар сифатида тенг кўрсаткич билан пешқадамликни сақлаб турибди.
Нуфузли transfermarkt.world портали келтирган маълумотларга кўра, улардан кейинги энг йирик чиқиш трансферлари қуйидагича тартибда жой олган:
-
Элье Вахи – «Марсель», 27 миллион евро
-
Секо Фофана – «Ан-Наср», 25 миллион евро
-
Кевин Дансо – «Тоттенхэм», 25 миллион евро
-
Нил Эл-Айнауи – «Рома», 23,5 миллион евро
-
Шейк Дукур – «Кристал Пэлас», 22,6 миллион евро
-
Энди Диуф – «Интер», 20 миллион евро
-
Лоик Баде – «Ренн», 17 миллион евро
-
Эл-Ҳажи Диуф – «Ливерпуль», 15 миллион евро
Шунингдек, Ҳусановнинг «Ланс» тарихидаги энг даромадли ўйинчи сифатида қайд этилиши ўзбекистонлик футболчиларнинг Европадаги нуфузини янада оширди.
«Замин»ни Telegram’да ўқинг!
