Болгария пойтахти София шаҳрида ўсмирлар ўртасида дзюдо бўйича жаҳон чемпионати ўз якунига етди ва унда ёш дзюдочиларимиз тарихий ютуққа эришишди. Мусобақа давомида спортчиларимиз юксак маҳорат ва жасорат намойиши орқали нафақат медаллар, балки умумжамоа ҳисобида биринчи ўринни ҳам қўлга киритишди.
Жаҳон чемпионатининг сўнгги кунги беллашувлари ҳам Ўзбекистон терма жамоаси учун омадли кечди. Хусусан, қизлар ўртасида +70 кг вазн тоифасида тўқнашувларда иштирок этган Умида Ниғматова барча рақибларини мағлубиятга учратиб, олтин медалга эга чиқди. Унинг ғалабаси жамоамиз ҳисобига яна бир муҳим очко қўшди ва умумий натижаларни мустаҳкамлади.
Шу тариқа, ўсмир дзюдочиларимиз жами 5 та олтин ва 2 та бронза медалини қўлга киритишди. Бу натижа уларни умумжамоа ҳисобида мутлoқ етакчига айлантирди. Мусобақадаги юқори кўрсаткич ёш дзюдочиларимиз тайёргарлиги, сабр-тоқати ва иродаси қай даражада эканини яна бир бор намоён этди.
«Замин»ни Telegram’да ўқинг!
