Чехия терма жамоаси аъзоси, теннисчи Каролина Мучова АҚШ очиқ чемпионатининг иккинчи босқичида ўйинни вақтинча тўхтатишга мажбур бўлди. Бунга унинг собиқ йигитининг кутилмаганда трибунада пайдо бўлиши сабаб бўлгани ҳақида New York Post ёзмоқда.
Мучова ўйин давомида йиғлаб юбориб, юзини сочиқ билан ёпди ва ҳакамга мурожаат қилди. Кейинчалик матбуот анжуманида спортчи бу ҳолатни изоҳларкан, собиқ севгилиси “бўлиши керак бўлмаган жойда” чиққанини айтиб ўтди.
“У скамейкамнинг рўпарасида ўтириб олди. Баъзида у мутлақо керакмас пайтда кўринади. Бу мени бироз чўчитди. Мен ундан кетишини сўрадим, дастлаб рад этди, кейин эса чиқиб кетди. Ўша вақтда диққатни жамлашим жуда қийин бўлди”, — деди теннисчи.
Шу каби ноқулай вазият ва кучли эмоционал босимга қарамай, Мучова ўзини қўлга олди ва баҳсни ғалаба билан якунлади (7:6, 6:7, 6:4). “Ҳа, ўзимни яхши ҳис қиляпман. Ҳеч қандай шикоятим йўқ, ҳаммаси жойида”, — дея қўшимча қилди спортчи.
«Замин»ни Telegram’да ўқинг!
