Бишкек шаҳрида старт олган U-23 Осиё Кубоги саралаш босқичида Ўзбекистон ёшлар терма жамоаси ўзининг илк учрашувини ўтказди. Равшан Ҳайдаров шогирдлари майдонда Шри-Ланкага қарши куч синашиб, 4:0 ҳисобидаги йирик ғалабани қўлга киритди ва гуруҳдаги биринчи уч очкосини ўз ҳисобига ёзиб қўйди.
ЎФА матбуот хизматига кўра, баҳсдан кейинги матбуот анжуманида бош мураббий Равшан Ҳайдаров учрашув ҳақида ўз фикрларини билдирди:
«Бутун беллашув давомида устунлик биз томонда бўлди. Тўп устидан назоратни қўлимиздан чиқармадик. Албатта, Шри-Ланка жамоаси ҳам анча қатъият билан ҳимояланди. Бироқ биз барибир йўл топиб, рақиб дарвозасига тўрт марта йўл топдик. Энг асосийси, мусобақадаги дастлабки ғалабамиз ва бу орқали қўлга киритган уч очко жуда катта аҳамиятга эга».
Ҳайдаров, шунингдек, жамоа ўйини ҳақида ҳам тўхталди:
«Ўйин давомида фаол ҳаракат қилдик, ҳужумда ташаббус кўрсатдик ва кўплаб вазиятлар яратдик. Бироқ уларнинг ҳаммасини голга айлантира олмадик. Шу билан бирга, Шри-Ланка термаси ҳимояда катта меҳнат қилди, уларнинг тузилиши ҳам диққатга сазовор эди. Бу рақибнинг ўйинига ҳурмат билан қараймиз».
Йирик ҳисобдаги ғалаба билан мусобақани бошлаган ёшлар термаси эндиликда кейинги учрашувларда ҳам шундай куч ва шиддатни сақлаб қолишни мақсад қилмоқда. Мухлислар учун эса бу ютуқ, албатта, катта қувонч ва келажакка ишонч уйғотди.
«Замин»ни Telegram’да ўқинг!
