Германия футбол афсонаси Лотар Маттеус Словакияга қарши кечган баҳсдан кейин миллий жамоа ўйинини қаттиқ танқид остига олди. Унинг таъкидлашича, натижа 0:2 ҳисобида йўқотишдан ҳам кўра, жамоанинг майдонда кўрсатган ўйини ўта ранжитувчи бўлди.
— 0:2 ҳисобида мағлуб бўлиш — табиий ҳолатдек кўриниши мумкин. Лекин энг ачинарлиси — ўйинни тўлиқ бой беришда. Агар ҳисоб 4:0 ёки 5:0 бўлиб кетса ҳам, ҳайрон қолмасдим. Дарвозабон энг яхши футболчи бўлиб қолган жамоа ҳақида ижобий хулоса чиқариш қийин, — деди Маттеус.
Унинг фикрича, Германия термаси режа ва тактик ўзгаришларда ҳам жиддий муаммоларга дуч келмоқда.
— Менга ҳеч қандай тактик тажриба маъқул келмади. Жамоа қандай ўйнаши, қайси режалар асосида ҳаракат қилиши кераклигини умуман англамадим. Бу ҳолат хавотирли, — деб қўшимча қилди у.
Маттеус айрим футболчиларнинг ўйинига алоҳида тўхталиб ўтди.
— Ойдинки, асосий эътибор Рюдигер ва Виртцга қаратилган эди. Бироқ битта ўта ёмон ўйин учун барча айбни уларга ағдариш тўғри эмас. Рюдигерда баъзан ортиқча иштиёқ салбий таъсир кўрсатиши мумкин. Аммо Нагельсманн бу босқичда фақат исмларга эмас, балки жамоага руҳий жиҳатдан керакли кайфиятни бериши мумкин бўлган футболчиларга ҳам ишониши керак. Масалан, Антон, Андрих ёки Шлоттербек каби йигитларга имконият бериш зарур, — дея таъкидлади у.
Шу тариқа, Маттеус Германия термасига жиддий хулосалар чиқариш вақти келганини уқтирди. Унинг сўзларига кўра, бундай ўйин билан жаҳон чемпионатида яхши натижага эришиш қийин бўлиши мумкин.
«Замин»ни Telegram’да ўқинг!
