Маълумки, айни кунларда Англиянинг Ливерпуль шаҳри катталар ўртасидаги нуфузли бокс бўйича жаҳон чемпионатига мезбонлик қилмоқда. Бу нуфузли мусобақада Ўзбекистон вакиллари ҳам рингга чиқиб, муносиб иштирок этишмоқда.
Шулардан бири, 85 килограмм вазн тоифасида куч синашаётган ҳамюртимиз Акмалжон Исроилов кечги баҳсларда испаниялик рақиби Рикардо Фреснедага қарши жанг қилди. Беллашув аввалиданоқ Исроиловнинг устунлиги сезилиб турди. У жангни катта иштиёқ ва ҳеч қандай орқага чекинмасдан олиб борди. Ҳар бир раундда рақибини босим остида ушлаб, кучли зарбалар билан устунлигини кўрсатди.
Якунда ҳакамлар бир овоздан қарор чиқаришди — 5:0 ҳисобида ғалаба Исроиловга насиб этди. Шу тариқа, боксчимиз жаҳон чемпионатининг ярим финалига йўлланмани қўлга киритди ва ўз олдига қўйган мақсадга яна бир қадам яқинлашди.
Эслатиб ўтамиз, юртимиз номидан яна бир истеъдодли вакил — Навбаҳор Ҳамидова ҳам ўзи учун муҳим бўлган жангда рингга кўтарилиши кутилмоқда. Унинг рақиби эса Хитой Тайпейи термасининг етакчи спортчиси Чен Ниен-Чин ҳисобланади.
Ўз навбатида, мамлакатимиз бокс мухлислари Акмалжон Исроиловнинг ярим финалда ҳам шиддатли ва ишончли жанг кўрсатишига, қолаверса, Навбаҳор Ҳамидованинг ғалаба қозониб финалга йўл олишига катта умид бағишламоқда.
«Замин»ни Telegram’да ўқинг!
