Суперлиганинг 21-туридан ўрин олган “Пахтакор” – “Нефтчи” (2:1) баҳси ортидан меҳмонлар бош мураббийи Виталий Левченко матбуот анжуманида журналистлар саволларига жавоб берди. У, аввало, рақибни ғалаба билан табриклади:
— “Пахтакор”ни ғалабаси билан табриклайман. Улар муносиб ўйнашди, жамоавий ҳаракат қилиб, ҳисобни сақлаб қолишни уддалашди, – деди Левченко.
Мураббийдан анъанавий 3-5-2 схемаси ҳақида ҳам сўрашди. Айни пайтда “Пахтакор” бир киши кам бўлиб қолганидан кейин ҳужумчилар сонини кўпайтириши мумкинлиги ҳақида савол берилди. Левченко эса шундай жавоб қайтарди:
— Агар биз кўпроқ очилганимизда, рақибнинг қарши ҳужумлари янада хавфли бўларди. Улар таркибида маҳоратли футболчилар бор, шуни ҳисобга олдик. Футбол – одамлар ўйини. Айрим вазиятларда кимдир тўпга улгурмаслиги мумкин. Салбий натижа ҳам ўзига хос хулосадир.
Мураббий “Пахтакор” таркибидаги терма жамоа футболчилари ҳақида ҳам фикр билдирди:
— “Пахтакор” сафида 10 нафар, бизда эса 7 нафар футболчилар терма жамоада эди. Шунинг учун бугун икки жамоанинг жисмоний жиҳати деярли тенг бўлди. Лекин “Пахтакор” футболчилари яккакурашларда ютишди.
Учрашувда мезбонлар бир киши кам қолганидан кейин вақтни ўтказиш учун айёрликдан фойдаланишганини айтиб ўтди:
— Бу футболда одатий ҳол. Агар “Нефтчи” бир киши кам қолганида, худди шундай йўл тутиши мумкин эди. Асосий вақт тугаганда ҳакам қўшимча дақиқаларни жуда кам берди.
Журналистлар айрим футболчиларнинг майдондаги ҳаракатлари ҳақида савол беришди. Левченко эса жавоб қайтарди:
— Футболда “юлдуз” футболчилар ва “юлдуз” жамоалар бор. Аксарият ҳолларда “юлдуз” ўйинчилар майдонда югуришга кам ҳаракат қилади. Шундайлар захирага ўтириб туриши керак. Масалан, Кожо бўлмаса, унинг ўрнига Нимели бор.
“Нефтчи”нинг келгусидаги тақвими ҳақида сўз юритар экан, мураббий қийин рақибларга қарши баҳсларга тайёргарлик ҳақида шундай деди:
— Фақат меҳнат ва қурбонлик орқали. Ҳозир футболда югурмасдан ўйнаш даври ўтиб кетган. Футболчида хоҳиш ва истак бўлмаса, натижа бўлмайди.
Охир-оқибат Левченко тан олди:
— Мағлуб бўлган пайтда ҳар доим нимадир етишмайди. Футбол хатолардан иборат. Камроқ хато қилган жамоа ғалаба қозонади. Шу сабаб “Пахтакор”ни ғалабаси билан табриклайман.
Шу тариқа, баҳс ортидан “Нефтчи” устози ўз жамоасига танқидий қараб, рақибнинг кучли томонларини эътироф этди. Унинг фикрича, “Пахтакор”нинг ғалабаси — ҳимоядаги интизом ва охиригача курашиш натижаси.
«Замин»ни Telegram’да ўқинг!
