Ливерпул шаҳрида ўтаётган катталар ўртасидаги жаҳон чемпионатида вакилларимиз иштирокидаги куннинг иккинчи финал жанглари ҳам томошабопликка бой бўлди.
-80 килограмм вазн тоифасида юртимиз номидан рингга чиққан 20 ёшли истеъдодли боксчи Жавоҳир Умматалиев франциялик Йожерлен Сезарга қарши тўқнаш келди. Унга қарши кечган уч раундлик беллашувда Умматалиев аниқ зарбалар ва ишончли ҳаракатлари билан тўлиқ устунликни қўлга киритди.
Ҳакамлар бир овоздан жангни 5:0 ҳисобида ўзбек боксчиси фойдасига баҳоладилар. Шу тариқа Жавоҳир Умматалиев ўзининг ёш бўлишига қарамай, жаҳон чемпиони унвонини қўлга киритди ва боксчиларимиз қаторида яна бир ёрқин ютуққа эришди.
Мазкур ғалаба натижасида Ўзбекистон делегациясининг умумий олтин медаллари сони учтага етди. Эслатиб ўтамиз, куни кеча Фазлиддин Эркинбоев юртимизга дастлабки олтин медални тақдим этган бўлса, бугун Асадхўжа Мўйдинхўжаев иккинчи олтинни қўлга киритган эди. Шунингдек, аёллар баҳсларида терма жамоамиз спортчилари учта бронза медалини ҳам ютиб беришган.
14 сентябр куни бўлиб ўтаётган финал кунлари ҳали якунланмади. Ҳозирги вақтда яна бир нечта вакилларимиз олтин медал учун рингга чиқишади: Тўрабек Ҳабибуллаев Бразилия вакилига қарши, Навбаҳор Ҳамидова Қозоғистон спортчисига қарши, Абдумалик Халоков яна бир бразилиялик боксчига қарши, Акмалжон Исроилов Англия вакилига қарши ва Жаҳонгир Зокиров эса қўшни Қозоғистон спортчисига қарши кураш олиб боради.
Юртимиз мухлислари улардан ҳам шиддатли ва тантанали ғалабалар кутишмоқда.
«Замин»ни Telegram’да ўқинг!
