Португалия футболида катта янгилик — машҳур мураббий Жозе Моуриньо яна Ватанга қайтиш арафасида. Инсайдер Фабрицио Романо ўзининг X ижтимоий тармоғида тарқатган маълумотга кўра, Лиссабоннинг “Бенфика” клуби тажрибали мутахассисни бош мураббий сифатида тайинлаш жараёнини якунлаб бормоқда.
Манба таъкидлашича, 62 ёшли Моуриньо билан 2027 йилгача мўлжалланган шартнома имзоланиши режалаштирилган. Барча расмиятчилик ишлари эса келаси 24 соат ичида тугаши кутилмоқда. Бу хабар ортидан “Бенфика” мухлислари орасида катта қувонч ва интизорлик кайфияти пайдо бўлди.
Эслатиб ўтиш жоиз, Жозе Моуриньо мураббийлик фаолиятини айнан “Бенфика” клубида бошлаганди. Кейинчалик у дунё футболида энг нуфузли клублар – “Реал Мадрид”, “Челси”, “Интер”, “Тоттенҳэм”, “Рома”, “Порту” ҳамда “Манчестер Юнайтед”да ишлаб, ўзига хос услуби ва ғалабалари билан катта из қолдирган. Унинг сўнгги иш жойи эса Туркиянинг “Фенербаҳче” клуби бўлди.
“Бенфика” раҳбарияти Моуриньони жамоага таклиф этиш қарорини ЕЧЛнинг илк турида “Қорабоғ”га (2:3) кутилмаган мағлубиятдан кейин қабул қилди. Ушбу натижа ортидан бош мураббий Бруну Лаже дарҳол ишдан бўшатилди.
Жозе Моуриньо эса бундан аввал журналистлар билан суҳбатда “Бенфика”ни бошқариш имконияти унга қизиқарли эканини ва бундай таклифни рад этмаслигини ошкор қилганди. Энди эса у “бургутлар”нинг янги етакчиси сифатида майдонга қайтишига деярли ишонч комил.
Шубҳасиз, унинг қайтиши нафақат клуб, балки бутун португалия футболи учун янги тарихий босқич бўлиши мумкин.
«Замин»ни Telegram’да ўқинг!
