“Барселона”нинг энг истеъдодли вакилларидан бири саналган Гави учун бу мавсум бошиданоқ омадли кечмади. Испания матбуотининг нуфузли нашри AS тарқатган хабарга кўра, 21 ёшли яримҳимоячи тиззасидан олган оғир жароҳати сабаб операция қилдиришга мажбур бўлди.
Жарроҳлик амалиёти пайтида мутахассислар футболчининг тиззасидаги ҳолат кутилганидан ҳам оғирроқ эканига гувоҳ бўлишган. Бу эса унинг тикланиш жараёни узоқ вақт талаб қилиши мумкинлигини кўрсатмоқда.
Манбаларга кўра, Гави камида 2026 йилнинг февраль ойигача майдонга қайта олмайди. Бу “Барселона” учун жуда катта йўқотиш, чунки жамоа бош мураббийи Ханс-Дитер Флик ёш футболчига катта ишонч билдирган, унинг жамоадаги ўрнига алоҳида эътибор қаратган эди. Германиялик мураббий ушбу хабарни эшитиб, қаттиқ ҳаяжонга тушгани айтилаяпти.
Эслатиб ўтиш жоиз, Гави жорий мавсумни яхши бошлай олмади. У август ойида жароҳат олган ва шу кунга қадар фақат иккита расмий учрашувда майдонга тушишга улгурди. Шу ўйинларда у бир марта ассистент сифатида ўзини кўрсатди.
Ёш яримҳимоячининг жамоага қайтиши ҳозирча ноаниқ, аммо “Барселона” унинг тикланиши учун барча зарур шарт-шароитларни яратиб бериши айтилмоқда. Футболчи мухлислари эса Гавининг яна сафга қайтиб, ўзининг ғайратли ўйини билан жамоага ёрдам беришини интизорлик билан кутмоқда.
Бу ҳолат “Барселона”нинг мавсумдаги режаларига жиддий таъсир кўрсатиши мумкин. Чунки Гави клубнинг марказий фигураларидан бири бўлиб, унинг майдондаги қатъиятли ҳаракатлари ва креатив ўйини жамоага кўп бора ёрдам бериб келаётган эди.
«Замин»ни Telegram’да ўқинг!
