"Барселона" бош мураббийи Ханси Флик ярим ҳимоячи Гавининг умумий гуруҳ машғулотларига қайтганини эълон қилди. Испаниялик футболчи тиззасидаги оғир жароҳат сабабли 205 кун давомида майдонга туша олмаган эди. Бу ҳақда Goal.com хабар беради.
Клуб расмий сайти Гавининг тиббий кўрикдан муваффақиятли ўтгани ва якшанба куни "Севилья"га қарши кечадиган баҳсда иштирок этишга тайёрлигини тасдиқлади. Футболчи кутилганидан кўра тезроқ тикланишга муваффақ бўлди.
Ханси Флик ёш иқтидор эгасининг қайтишидан мамнунлигини билдирди, бироқ уни эҳтиёткорлик билан ўйинга жалб қилишини таъкидлади. Мураббийнинг сўзларига кўра, Гави дастлабки учрашувларда захирадан майдонга тушиши кутилмоқда.
«У тиббий рухсат олди ва мен бундан хурсандман. Машғулотларда кўрсатган ўйини менга маъқул келди, аммо биз уни босқичма-босқич ўйин амалиётига қайтаришимиз керак», — деди германиялик мутахассис.
Флик футболчининг руҳий ҳолати ва жисмоний курашларга тайёрлигига шубҳа қилмаяпти. Мураббий Гавининг майдондаги шижоати ва ўз танасига бўлган 100 фоизлик ишончини юқори баҳолади.
“Zamin”ни Telegram'да ўқинг!
