38 ёшни қаршилаган ва ҳозирда мутлақ жаҳон чемпиони мақомига эга бўлган украиналик машҳур боксчи Александр Усик яқинда ўзига улкан шон-шуҳрат олиб келган йўл ва сири ҳақида тўхталиб ўтди. Унинг фикрича, ҳар қандай муваффақият ортида сабр, интизом ва узлуксиз меҳнат турибди.
«Ҳаётда ҳеч қандай нарса осонгина қўлга кирмайди. Бола чоғимданоқ менга интизом, матонат ва ўзини фидо қилиш фазилатлари асос бўлиб хизмат қилди. Ана шу қадриятлар мени камолга етказди, қийин дамларда куч бағишлади ва йиқилган пайтларимда яна тикланишимга ёрдам берди. Интизом – мен учун илҳомнинг бош манбаи, олға интилишим учун туртки ва ҳар қандай синовларда энг ишончли таянч нуқтам бўлди», – деди Усик.
Боксчи ўз спорт йўлида тўплаган совринларини оддий бир жиҳоз сифатида эмас, балки кўп йиллик меҳнатнинг меваси сифатида қабул қилишини қўшимча қилди. «Мен Олимпиадада олтин медалга эришдим, икки вазн тоифасида мутлақ чемпионликни қўлга киритдим. Лекин бунга ёлғизгина рингда курашиб эмас, менга ишонган, орқамда турган инсонларнинг қўллаб-қувватлови билан эришдим. Шу боис бу камарлар оддий металл ёки теридан тайёрланган буюм эмас. Улар кўп йиллик машаққат, меҳр ва садоқатнинг тимсоли!» – дея таъкидлади Усик.
Маълумот учун, Александр Усик ҳозирда нафақат украин спортида, балки бутун жаҳон бокс тарихида ҳам энг йирик ва эътироф этилган чемпионлардан бири сифатида ном қозонган. Унинг номини тилга олишнинг ўзиёқ спорт оламида куч, матонат ва профессионаллик билан боғланади.
«Замин»ни Telegram’да ўқинг!
