"Пари Сен-Жермен" бош мураббийи Луис Энрике клубни янги мавсум олдидан кучайтириш жараёнида катта муаммолар ва жиддий масъулиятлар борлигини очиқ баён қилди. Испаниялик мутахассиснинг таъкидлашича, трансфер бозорида керакли ўйинчи топиш нафақат молиявий жиҳатдан, балки спортчилик ва шахсий фазилатлар нуқтаи назаридан ҳам ўта мураккаб жараён ҳисобланади.
"ПСЖ учун футболчи топиш ҳеч қачон осон бўлмаган ва бугун ҳам шундай. Жамоага қўшиладиган ҳар бир ўйинчида бир нечта асосий омиллар уйғун бўлиши зарур: унинг шахсий фазилатлари, катта маблағлар билан боғлиқ талаблар ва энг муҳими, улкан босимга чидамлилиги. Чунки сиз футболчи учун катта пул тўласангиз, ундан кутиладиган натижа ва босим янада ошади", – деди Энрике.
Унинг фикрича, "Пари Сен-Жермен" таркибида шиддатли рақобат бор ва ҳар бир янги футболчи бу муҳитга мослашиши шарт. Шундай экан, клуб ҳар бир қарорни узоқ муҳокама қилади, чуқур таҳлил қилади ва керакли номзодни топишда шошқалоқликка йўл қўймайди.
"Биз жамоамизга ишонамиз. Ўтган мавсумда бу ишонч янада мустаҳкамланди. Ҳозир ҳам хотиржам ишлаяпмиз, ҳар бир қарорни пухта таҳлил қиляпмиз. Бизга керакли футболчиларни топиш осон эмаслигини яхши англаймиз, аммо бу вазифадан қочмаймиз", – дея қўшимча қилди тажрибали мураббий.
«Замин»ни Telegram’да ўқинг!
