Португалия футболида янги воқеа кенг муҳокамаларга сабаб бўлди. Жозе Моуринионинг «Бенфика» бош мураббийи этиб тайинланиши унинг собиқ жамоаси «Порту» мухлислари орасида қаттиқ норозилик уйғотди.
Маълумки, Жозе Моуринио мураббийлик фаолиятининг илк ва энг ёрқин босқичларидан бири айнан «Порту» билан боғлиқ. У 2004 йилда жамоани Европа Чемпионлар лигаси ғолиблигига олиб чиққан ва Португалия футболи тарихида ўчмас из қолдирганди. Шу боис, кўплаб ишқибозлар уни клуб рамзий шахсияти сифатида қабул қилишган.
Бироқ айни пайтдаги воқеалар мухлисларнинг таассуротларини бутунлай ўзгартирди. «Риу Ав»га қарши кечган баҳс пайтида «Порту» ишқибозлари Моуриниога қарши ҳақоратли қўшиқлар куйлаб, ўз ғазабини ошкор қилди. Уларнинг назарича, клуб тарихи ва номини катта босқичга олиб чиққан мураббийнинг асосий рақибга ўтиши — беқиёс хиёнатдир.
Аммо бунинг салбий оқибатлари тез орада ўзини кўрсатди. Португалия футбол федерацияси «Порту» клубига ишқибозларнинг тартибсизлиги учун расман 3190 евро жарима солди.
Эслатиб ўтиш жоиз, Жозе Моуринио яқинда «Бенфика» билан икки йиллик шартнома имзолади. Унга қадар эса Португалия мутахассиси Туркияда «Фенербахче» жамоасини бошқарган, аммо айни пайтда у ердаги лавозимидан кетганди.
Шубҳасиз, Моуринионинг «Бенфика»даги фаолияти Португалия футболида яна кўплаб қизиқарли воқеалар ва можароларга сабаб бўлиши мумкин. «Порту» ишқибозлари эса бу қарорни ҳеч қачон кечирмаслигини аллақачон намоён қилди.
«Замин»ни Telegram’да ўқинг!
