“Манчестер Сити”га тегишли бўлган, айни пайтда “Эвертон” клубида ижара асосида тўп сураётган ҳужумчи Жек Грилиш яқинда берган интервьюсида шахсий ҳаёти ва майдондан ташқари одатлари ҳақида очиқ гапирди. Унинг айтишича, базм ва зиёфатларга қизиқиши ҳақиқат, бироқ бу масалада доимо тўғри вақтни танлай олмаган.
“Одамлар: ‘У сайр қилишни ва турли хил зиёфатларда қатнашишни яхши кўради’, дейишади. Бунинг ўзи ҳақиқатдан йироқ эмас. Мен ҳам ҳаётдан завқ олишни ва тўлақонли яшашни истайман. Бироқ ҳар бир нарсанинг вақти ва жойи бор. Ҳаққоний айтаман, баъзи ҳолатларда мен нотўғри вақтда шундай йиғинларда қатнашган бўлишим мумкин. Масалан, “Манчестер Сити”да ўйнаган пайтларимда ўзимни тўлиқ назорат қила олмаган ҳолатларим бўлган. Аммо шуни айтиб ўтмоқчиманки, муаммо фақат шунда эмас”, – деди инглиз ҳужумчиси.
Грилишнинг бу сўзлари мухлислар орасида турли фикрларни келтириб чиқарди. Айримлар унинг самимийлиги ва ўз хатоларини тан олишини қадрлашса, бошқалар унинг профессионал футболчи сифатида тўлиқ тарзда спортга бағишланиши зарурлигини таъкидлашмоқда.
Айни пайтда Жек Грилиш “Эвертон” сафида АПЛнинг янги мавсумида 5 та ўйинда иштирок этди ва 4 та ассист билан жамоасига катта ёрдам берди. Бу кўрсаткич унинг майдонда ҳам жиддий меҳнат қилаётганини кўрсатмоқда.
Футболчи бу мавсумда ўзи учун янги саҳифа очишни мақсад қилиб олганини, майдонда эса имкониятдан тўлиқ фойдаланишга интилишини таъкидлади. Шу билан бирга, у ҳаётдаги хатоларидан сабоқ олиб, профессионал фаолиятида янада барқарорликка эришиш ниятида эканини билдириб ўтди.
Шубҳасиз, Грилишнинг майдондаги ўйини билан бир қаторда шахсий ҳаёти ҳам оммавий ахборот воситалари ва мухлислар диққат марказида бўлиб қолаверади.
«Замин»ни Telegram’да ўқинг!
