“Манчестер Сити”да янгиланиш тўлқини 2025 йил 20 январда “Ланс”дан келган Абдуқодир Ҳусанов билан амалий тарзда бошланган, ҳозир ҳам суръат оширмоқда. Энди эса бу жараённинг қай даражада самарали кечиши кўп жиҳатдан ўзбек ҳимоячисининг ўйини ва соғлигига боғлиқ бўлиб қолди.
Кайл Уокер кетгач, “шаҳарликлар”нинг энг нозик бўғини — ўнг қанот ҳимоясида бўшлиқ пайдо бўлгани яширин эмас. Унинг ўрнини босиши кутилган Рико Льюис ва яримҳимоячи табиатли Матеуш Нуньеш бу позицияда етарлича ишонч уйғотолмади, натижада муҳим баҳсларда очколар йўқотилди. Пеп Гвардиола ёзда махсус трансфер қилмагани учун ички ресурсларни синаб кўришга мажбур бўлди ва табиатан марказий ҳимоячи бўлган Ҳусановни ўнг қанотга сурди.
Бу қадам ўзини оқлади: 21 ёшли легионеримиз кетма-кет тўрт учрашувда ўнг қанотни “қулфлаб”, тезкор реакцияси ва позицион ўйини билан мураббийлар штабига ҳам, мухлисларга ҳам ёқимли таассурот қолдирди. Ҳусановнинг бу ердаги имкони ҳам мантиқий: марказда Жон Стоунз, Рубен Диаш, Йошко Гвардиол ва Натан Аке билан катта рақобат бор, ўнгда эса унинг ҳимоявий устунликлари Льюис ва Нуньешдан кўпроқ сезилади.
Афсуски, “Арсенал”га қарши баҳсда олган жароҳат темпни секинлатди. Илк башоратларда айтилган икки ҳафтадан кўпроқ реабилитация керак бўлаётгани фонида ўнг қанот масаласи яна кун тартибига қайтди. Daily Mail’нинг бош мухбири Жек Гоган ёзишича, “Сити” қишда ўнг ҳимоячи олиш-олмасликни айнан Ҳусановнинг қайтиши ва формасига қараб белгилайди: агар ФИФА кунларидан кейин яна юқори даражада ўйнашни давом эттирса — январда бозорга кирилмайди; акс ҳолда, ўнг қанот учун манзилли трансфер амалга оширилади.
Яъни Абдуқодир олдида старт таркибида муқим ролни мустахкамлаш учун реал имконият очилган. Гвардиола ҳозирнинг ўзида мавсум охиригача унга мунтазам майдон вақти беришга тайёрлигини кўрсатди — футболчимиздан талаб битта: сўнгги тўрт учрашувдаги барқарор ўйинни яна такрорлаш.
“Манчестер Сити”нинг навбатдаги учрашуви 18 октябр куни “Олимпияда”да “Эвертон”га қарши. Ҳусанов шу баҳсгача тўлиқ сафга қайтиши кутилмоқда. Агар ўзига хос чидам ва интизомни яна намойиш этса, клубнинг қишки трансфер режасига ҳам “ўнгдан” тегишли тузатиш киритади.
“Zamin”ни Telegram'да ўқинг!
