Ўзбекистон Профессионал футбол лигаси (ЎзПФЛ) Суперлигада сентябрь ойининг энг яхши мураббийини эълон қилди. Бу мукофот «Насаф» клуби бош мураббийи Рўзиқул Бердиевга насиб этди.
54 ёшли тажрибали мутахассис жорий мавсумда иккинчи бор, умумий ҳисобда эса 16-марта ой мураббийи бўлди. Бу кўрсаткич Бердиевнинг миллий чемпионатдаги барқарор иш услубини ва жамоаси билан эришган муваффақиятларини яна бир бор тасдиқлади.
ЎзПФЛ хабарига кўра, Бердиев бу борада ўзининг рекордини янгилашда давом этмоқда. Унинг раҳбарлигидаги «Насаф» сентябрь ойида Суперлига доирасидаги барча учрашувларда ғалаба қозонди.
Қаршиликлар 10 сентябр куни «Бухоро»ни 5:0 ҳисобида йирик мағлубиятга учратди. 21 сентябрда «Қизилқум» устидан 1:0, 29 сентябрда эса «Хоразм»ни 2:1 ҳисобида енгиб, тўлиқ 9 очко жамғарди. Ушбу баҳсларда тўплар нисбати 8:1 ни ташкил этди.
Рўзиқул Бердиевнинг жамоаси нафақат натижалар, балки ўйин услуби билан ҳам мухлислар эътиборини қозонмоқда. “Аждарлар” ҳар бир ўйинда интизомли ҳаракат, кучли прессинг ва ҳужумда самарадорлик намойиш этмоқда.
Ҳозирги пайтда «Насаф» Суперлига жадвалида 53 очко билан пешқадамлик қилмоқда ва чемпионлик учун асосий даъвогарлардан бири ҳисобланади.
Футболдаги барқарор натижалари билан Рўзиқул Бердиев нафақат жамоасининг, балки бутун мамлакат футболи ривожига ҳисса қўшаётганини кўрсатмоқда.
“Zamin”ни Telegram'да ўқинг!
