Англия футболи афсоналаридан бири, “Олтин тўп” соҳиби Майкл Оуэн “Манчестер Юнайтед” клубининг ҳозирги аҳволига нисбатан кескин фикр билдирди. Унингча, клуб Фергюсон давридан кейин ўз йўлини йўқотган.
“Алекс Фергюсон кетганидан сўнг, жамоа турли мураббийларни синаб кўрди, — дейди Оуэн. — Аммо улардан ҳеч бири катта муваффақиятга эришолмади. Кейин айбни ўйинчиларга ағдаришди. Бутун дунёдан энг машҳур футболчиларни олиб келиш учун миллиардлаб фунт сарфлашди. Лекин натижада ‘Манчестер Юнайтед’ ўзига хос футболчилар қабристонга айланди. Бу клубда кўпчилик юлдузлар ёрқин порламай, йўқолиб кетди”, — дея таъкидлади собиқ ҳужумчи.
Оуэннинг бу гаплари жамоа мухлислари орасида катта муҳокамага сабаб бўлди. Айни пайтда “Юнайтед” Премьер-лигада 10 очко билан жадвалнинг ўрталарида бормоқда.
Рубен Аморим бошқарувидаги жамоа ўйини ҳали ҳам тинимсиз танқидларга учрамоқда. Кўплаб экспертлар фикрича, “қизил иблислар” кейинги йилларда ўз анъанавий кучини йўқотган ва ҳозиргача Фергюсондан кейинги бўшлиқни тўлдира олмаган.
Эслатиб ўтамиз, “Манчестер Юнайтед” Премьер-лига чемпионлигини охирги бор 2013 йилда қўлга киритган эди — бу эса айнан Фергюсон бошқарган сўнгги мавсум бўлган.
Жамоа кейинги йилларда жаҳоннинг энг қиммат ўйинчиларини жам қилган бўлса-да, натижалар барибир мухлисларни қониқтирмаяпти.
Майкл Оуэннинг сўзларига кўра, “Юнайтед”нинг ҳақиқий муаммоси — тактик изланиш эмас, балки йўналиш ва руҳни йўқотишдир.
“Бу клубда фақат пул эмас, анъана ҳам ишлаши керак. Бир вақтлар ‘қизил иблислар’ сўзининг ўзи рақибларга қўрқинч соларди. Энди эса улар ўзига ишончни йўқотиб бўлди”, — деди собиқ юлдуз.
“Zamin”ни Telegram'да ўқинг!
