“Барселона” клуби президенти Жоан Лапорта яқинда берган интервьюсида шахсий эътиқоди ҳақида гапирди ва ўз фикрлари билан жамоатчиликда катта қизиқиш уйғотди. Унинг сўзларига кўра, у Худога ишонади, аммо ўзини диндор деб ҳисобламайди.
“Мен Худога ишонаман. Имон менга куч ва ишонч беради, лекин мен диний амалларни бажара олмайман. Мен учун ишонч – бу инсонни ички жиҳатдан мустаҳкамлайдиган куч. Бир эпископ айтганидек, жаннат – бу ‘Барса’ ҳар беш дақиқада ‘Реал’ дарвозасига гол урган жой. Агар Худо бор бўлса, у албатта ‘Барселона’ тарафида”, – деди Лапорта табассум билан.
Кўплаб мухлислар унинг бу сўзларини ҳазил ва ишонч аралаш фикр сифатида қабул қилишди. Аммо Лапорта ҳар доим ўз клубини фақат спорт жиҳатидан эмас, балки маънавий куч жиҳатидан ҳам юқори қўядиган шахс сифатида танилган.
Айни пайтда Ла Лиганинг 8-туридан сўнг “Реал Мадрид” 21 очко билан чемпионатда пешқадамлик қилмоқда. “Барселона” эса 19 очко билан иккинчи поғонада жойлашган. Мавсумнинг энг кутилган баҳси – “Эль Класико” 26 октябрь куни бўлиб ўтади. Ушбу беллашув нафақат жадвалдаги рақобатни, балки Лапорта айтган “жаннатдаги ғалаба”нинг символик маъносини ҳам яна бир бор намоён этиши мумкин.
Шу тариқа, “Барса” президентининг қалбдан чиққан сўзлари мухлислар орасида катта муҳокамага сабаб бўлди. Унинг “Худо ‘Барса’ билан” деган гапи клуб тарихидаги энг ёдда қоларли иқтибослардан бирига айланиши мумкин.
“Zamin”ни Telegram'да ўқинг!
